Temirjolda jolaýshy tasymaly 29% óskenimen pandemııaǵa deıingi kórsetkishke áli jetken joq

NUR-SULTAN. QazAqparat – Aqpan aıynyń qorytyndysy boıynsha eldegi temirjol arqyly jolaýshy tasymaly 29 paıyz ósken, dep habarlaıdy QazAqparat tilshisi.

Ranking.kz resýrsynyń jazýynsha, bul – koronadaǵdarysqa deıingi deńgeıden tómen kórsetkish.

«Bıylǵy qańtar-aqpan aralyǵynda temirjol tasymalymen aınalysatyn kompanııalardyń tabysy 196,2 mlrd teńge bolyp, byltyrǵydan 20,8% ósti. Tasymal tabysynyń negizgi bóligi nemese 185,2 mlrd teńgesi júk tasymalynan túsken. Jolaýshy tasymalynyń tabysy 11 mlrd teńge ǵana bolyp otyr», - dep jazady Ranking.kz.

Portaldyń málimetinshe, bıyl alǵashqy eki aıda temirjol kóligimen 70,8 mln tonna júk tasymaldanǵan. Bul byltyrǵy kezeńmen salystyrǵanda 10,2% kóp.

Óńirler arasynda Qaraǵandy oblysynda eń kóp júk tasymaldanǵan – 8,8 mln tonna.

Alǵashqy úshtikte Aqtóbe oblysy (7,7 mln tonna) men Nur-Sultan qalasy (7,4 mln tonna) bar.

«Qańtar-aqpan aralyǵynda temirjol arqyly 2,5mln adam qatynady. Bul byltyrǵy kezeńniń kórsetkishinen 28,8 paıyz kóp» delingen materıalda.