Temirjolda jol qaýipsizdigi erejesin buzý jaǵdaılary jıiledi - mınıstrlik
Arnaıy jabdyqtar men mobıldi dıagnostıkalyq keshendi qoldana otyryp, temirjoldar men baǵyt burmalaryn tekserý nátıjesinde (tekserý qazan aıynda Qazaqstannyń barlyq óńirlerinde júrgizildi) jolaýshylar men júk poezdary júretin temirjoldarda qozǵalys qaýipsizdigine qaýip tóndiretin 1000-nan astam ereje buzý jaǵdaıy anyqtaldy.
Tekserý qorytyndysy boıynsha temirjoldardy kútip ustaý boıynsha erejebuzýshylyqtardy joıý týraly nusqamalar berildi.
Poezdar qozǵalysynyń qaýipsizdigine qater tóndiretin óreskel zańbuzýshylyqtarǵa baılanysty tekserý kezinde 127 temirjol jáne 108 baǵyt burmalaryn paıdalaný toqtatyldy, 350 jyldamdyq shekteýleri berildi, sondaı-aq arnaıy jyljymaly quramnyń 56 birligi paıdalanýdan qalyp qoıdy. Zańbuzýshylyqtardy joıǵanǵa deıin ShQO, Pavlodar, Qostanaı, Qaraǵandy oblystarynda jáne basqa da oblystarda birneshe temirjoldardyń qyzmeti tolyǵymen toqtatyldy.
2020 jyldyń on aıynda temirjol kóligi sýbektileri qozǵalys qaýipsizdigin 826 ret buzdy, ol boıynsha kóliktik baqylaý qyzmetkerleri 53 mln teńgege jýyq somaǵa ákimshilik materıaldar toltyrdy. Temirjol kóligindegi qozǵalys qaýipsizdiginiń jaı-kúıin taldaý ótken jyldyń uqsas kezeńimen salystyrǵanda ereje buzý áreketteriniń óskenin kórsetti: 2019 jyly 808 buzýshylyq tirkeldi.
«Qozǵalys qaýipsizdigi máseleleri QR IIDM Kólik komıtetiniń erekshe baqylaýynda ekenin atap ótý qajet. Baqylaý temirjol kóligindegi qozǵalys qaýipsizdigin, jyljymaly quramnyń saqtalýyn qamtamasyz etý, sondaı-aq sanıtarlyq-karantındik rejımdi eskere otyryp, temirjol kóliginiń qaýipsizdigin arttyrýǵa baǵyttalǵan is-sharalar josparyn oryndaý maqsatynda júrgiziledi. Eger siz temirjol kóliginde qozǵalys qaýipsizdiginiń buzylýyna jol berilgenine kýá bolsańyz, bul týraly QR IIDM Kólik komıtetiniń +7 7080880800 WhatsApp-nómirine habarlańyz»,-delingen habarlamada.
