Temirjol jolaýshylar tasymalyn sýbsıdııalaýdyń tıimdiligi arta túsedi - Senat
ASTANA. QazAqparat - Búgin Senattyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine temirjol jolaýshylar kóligi máseleleri boıynsha ózgerister men tolyqtyrýlar engizý týraly» QR Zańyn qabyldady.
Zań jobasy Elbasy N. Nazarbaevtyń Jarlyǵymen bekitilgen kólik ınfraqurylymyn damytýdyń jáne yqpaldastyrýdyń 2020 jylǵa deıingi memlekettik baǵdarlamasyn iske asyrýǵa baǵyttalady. Bul rette uzaqmerzimdi negizde jeke ınvestıtsııalar tartýdy esepke ala otyryp, temirjol tasymalyn memlekettik retteý men uıymdastyrýdyń biryńǵaı júıesin qalyptastyrý úshin quqyqtyq negiz jasalady. «Qujat negizgi birqatar mindetti júzege asyrady. Atap aıtqanda, áleýmettik mańyzdy qatynastar boıynsha jolaýshylar tasymalyn memlekettik sýbsıdııalaýdyń tıimdiligin arttyrý qarastyrylady.
Máselen, jolaýshylar tasymalyn júzege asyratyn tasymaldaýshylardyń zalalyn memlekettik sýbsıdııalaýdan olardyń shyǵyndaryn sýbsıdııalaýǵa kóshý kózdeledi. Onyń ishinde tasymaldaýshylardyń magıstraldy temirjol jelilerine, lokomatıvter kúshine qatysty shyǵyndaryn, jolaýshylar tasymaly vagondaryn jalǵa alý boıynsha shyǵyndaryn sýbsıdııalaý josparlanyp otyr», deıdi Investıtsııalar jáne damý mınısıri Áset Isekeshev. Onyń aıtýynsha, sýbsıdııalaýdyń bul túri qarajatty únemdeı otyryp, sýbsıdııalaý úderisiniń ashyqtyǵyn arttyrady.
