Temirjol týraly sheshim Astanada qabyldandy - Saǵyntaev
BAKÝ. QazAqparat - «Baký-Tbılısı-Kars» baǵdary Qazaqstan úshin Túrkııaǵa, Ońtústik Eýropa men Jerorta teńizine jol ashady. Sonymen birge, atalǵan baǵyt Transkaspııılik halyqaralyq kóliktik baǵdardyń jetekshi ınfraqurylymdyq jobasy bolyp tabylady. Bul týraly Qazaqstan Respýblıkasynyń Premer-mınıstri Baqytjan Saǵyntaev Baký-Tbılısı-Kars jańa temirjolynyń ashylý saltanatynda málim etti.
Saǵyntaev óz sózinde jańa temirjoldyń Ortalyq Azııa aımaǵynda tranzıttik-kóliktik jáne logıstıkalyq áleýetin arttyrýda tolyqqandy mańyzǵa ıe ekendigin atap ótti.
«Qazaqstan Eýrazııanyń týra ortasynda ornalasqan. Óz tarapynan bizdiń memleketimiz Eýropa men Azııa aralyǵyndaǵy transqurlyqtyq júk tasymalyn damytýda belsendi jumys atqaryp keledi. Biz Baký-Tbılısı-Kars temirjolynyń salynýyna alǵashqylardyń biri bolyp qoldaý bildirdik. Bul sheshimdi Ázerbaıjan, Túrkııa, Grýzııa memleketteri Qazaqstan men Qytaıdyń qoldaýymen qabyldaǵan bolatyn. Naqty osy sheshimniń Astanada qabyldanýy óte mańyzdy oqıǵa dep bilemiz», - deıdi QR Úkimet basshysy.
Onyń aıtýynsha, joba aımaqtaǵy saýda-sattyqty arttyryp, ekonomıkalyq ósimge serpin beredi.
«Qazaqstannyń mindeti tranzıttik-kóliktik áleýetti arttyryp, bul baǵdardy qurlyqaralyq eýrazııalyq júıege «altyn kópir» retinde jalǵaý bolyp tabylady. Biz «Nurly jol» memlekettik baǵdarlamasy arqyly osy tapsyrmany oryndaýǵa barynsha kúsh salyp jatyrmyz. Sońǵy 9 jylda Qazaqstandaǵy kólik-logıstıkalyq júıeniń damýyna 28 mlrd AQSh dollary quıyldy. Transkaspıılik dálizdiń salynýyn qoldadyq, 1700 shaqyrymdyq temirjol, 3500 shaqyrymdyq avtokólik joly salyndy. Aqtaý porty jańartylyp, Quryq paromdy porty irgesin kóterdi», - deıdi Baqytjan Saǵyntaev.
QR Premer-mınıstri sonymen birge, strategııalyq joba óziniń tıimdiligi qazirden-aq dáleldep qoıǵanyn aıtty.
«Jýyqta porttaǵy tasymaldanǵan júktiń mólsheri 1 mıllıon tonnaǵa jetti. Keleshekte Kaspııde qazaqstandyq porttyq ınfraqurylymynyń baqylaý qabilettiligi jylyna 25 mln tonnalyq júk tasymalyna jetedi», - deıdi Úkimet basshysy.
Sondaı-aq, ol Qazaqstan Transkaspıılik baǵyttaǵy tıimdi baǵdarlardy damytý úshin qarajat bólip otyrǵanyn jetkizdi.
«Atalǵan ınvestıtsııalardyń mólsheri shamamen 10 mln AQSh dollaryna jetti. Osylaısha, Qytaıdan, Ortalyq Azııadan, Reseıdiń Ýral men Sibir, Trankaspıılik aımaqtan keletin júk tasymaly aǵynynyń qysqa ýaqytta jetkizilýin qamtamasyz ettik. 2020 jyly Qazaqstannyń kóliktik-logıstıkalyq júıesiniń damýyna qosymsha 8 mlrd AQSh dollary bólinedi. Bul qadam Uly Jibek jolyndaǵy saýda-sattyqtyń órkendeýine tyń serpin beredi», - deıdi Baqytjan Saǵyntaev.
Úkimet basshysy óz sózinde osylaısha, tıimdi logıstıkalyq jol arqyly Qazaqstannyń kóliktik-logıstıkalyq ınfraqurylymy Shyǵys-Batys, Qytaı-Eýropa baǵytynda júk tasymalyn júzege asyratynyn jetkizdi.
