Temirjol stansalary basshylarynyń paramen ustalǵan vıdeosy jarııalandy

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi temirjol stansalarynyń basshylaryn ustaý kezindegi vıdeony jarııalady, dep xabarlaıdy QazAqparat tilshisi.

Sybaılas jemqorlyqqa qarsy is-qımyl ulttyq bıýrosy tóraǵasynyń orynbasary Shyńǵys Qabdollanyń aıtýynsha, temirjol qatynasy salasyndaǵy jemqorlyq áreketter júıeli túrde qaıtalanady. Sheneýnikter de, basqa basshylar da óz qyzmetterin asyra paıdalanyp jatady.

«Máselen, osy aptada «Qazaqstan temirjoly» AQ-syna qarasty Qostanaı joldary bólimshesi fılıalynyń dırektory, onyń orynbasary jáne stantsııa basshysy ustaldy. Olar kásipkerden jalpy somasy 6,1 mıllıon teńge kóleminde para alǵan. Sol úshin taýarlardy tasymaldaýǵa qajetti vagondardy kedergisiz berýge ýáde etken», - dedi Sh.Qabdolla Astanada ótken baspasóz máslıxatynda.



Onyń aıtýynsha, Almaty oblysynda Býrýndaı stantsııasynyń basshysy da para alǵany úshin kúdikke ilinip otyr. Ol vagon usynǵany úshin kásipkerden 100 myń teńge talap etken.



Aıta ketken jón, sońǵy úsh jyldyń ishinde temirjol tasymaly salasynda 70 jemqorlyq áreketi anyqtaldy. Sol úshin 33 laýazymdy tulǵa qylmystyq jaýapqa tartyldy, olardyń ishinde 28 adam sottaldy.

«Temirjol qatynasy salasyndaǵy jemqorlyq áreketteri jumysqa qabyldaýdan bastap memlekettik satyp alýlar, jolaýshylar men júk tasymalyna deıin taralyp ketken. Basshylar da, jolserikter de jaýapqa tartylady», - dep atap kórsetti Sh.Qabdolla.