Temirjol salasyndaǵy jemqorlyq: Árbir poıyz kúnine 100 myń teńgeden tapsyrady
Sybaılas jemqorlyqqa qarsy is-qımyl ulttyq bıýrosy tóraǵasynyń
orynbasary Shyńǵys Qabdollanyń aıtýynsha, atalǵan sxema boıynsha kóliktik baqylaý ınspektsııasy, «Qazaqstan temirjoly» AQ-sy men jelilik polıtsııanyń laýazymdy tulǵalary turaqty túrde zańsyz aqsha alyp otyrǵan. Arnaıy operatsııa Aqmola, Qaraǵandy, Pavlodar oblystary, Astana men Shymkent qalalarynda uıymdastyryldy.
«Sonyń nátıjesinde 50-den astam paraqor anyqtaldy. Olardyń ishinde «Qazaqstan temirjoly» AQ-synyń 31 qyzmetkeri bar. 3 revızor, kóliktik baqylaýdyń 3 ókili, jeke menshik tasymaldaýshylardyń 9 jumyskeri, 6 vokzal kezekshisi, 2 jelilik polıtseı, 6 alypsatar jáne taǵysyn taǵy. Máselen, alypsatarlardyń kóbisi - qylmystyq sxemaǵa qatysqandardyń týystary. Olar aqshany jınap otyrǵan. Al poıyz brıgadırlary men jolserikteri tekseristen qutylý úshin aqshany beri turdy. Zańsyz syıaqynyń kólemi 8-40 myń teńgeniń aınalasynda bolǵan», - dedi Sh.Qabdolla.
Arnaıy operatsııa kezinde qolǵa túskenderdiń bári para bergenderin moıyndady. Olardyń sózine qaraǵanda, poıyzdyń aqshasy jınalmasa, joǵarydan tekserister jiberiledi. Ondaıda aıyppuldar kóptep salynady. Odan da para berip qutylǵany artyq. Osylaısha, kúnde bir poıyzdan 100 myń teńge jınalyp turady. Bir aıdyń ishinde atalǵan soma 3 mıllıonǵa deıin barady.
«Bundaı «alym-salyqtar» kúnde jınalady. Sonyń saldarynan xalyqqa qyzmet kórsetý sapasynyń nasharlaıtyny belgili», - dep atap kórsetti Sh.Qabdolla.
Aıta keteıik, búgin QR Memlekettik qyzmet isteri jáne sybaılas jemqorlyqqa qarsy is-qımyl agenttigi temirjol stansalarynyń basshylaryn ustaý kezindegi vıdeony da jarııalady.