Temirjol salasyndaǵy qaýipsizdikti nyǵaıtý qajet - aptalyq brıfıng
ASTANA. Naýryzdyń 4-i. QazAqparat /Aıdar Ospanalıev/ - «Prokýrorlyq tekserýler elimizdiń temirjol kóligi salasyndaǵy júıeli kemshilikterdiń biri - kólik quraldarynyń eskirgendigimen baılanysty ekendigin kórsetti. Atalmysh jaǵdaı jol qozǵalysy men adamdardyń ómirine, sonymen qatar qorshaǵan ortaǵa tóngen qaýip», dedi búgin Bas prokýratýranyń resmı ókili Nurdáýlet Súıindikov.
Bul týraly ol jýrnalıstermen bolǵan aptalyq brıfıngte málim etti, dep habarlaıdy QazAqparat.
Resmı ókildiń derekterine qaraǵanda, «Lokomotıv» aktsıonerlik qoǵamynda kólik quraldarynyń 70 paıyzy eskirgen. Al «Qaztemirtrans» aktsıonerlik qoǵamynda bul kórsetkish 60 paıyzdy qurap otyr. «Tekserý barysynda temirjol kólikteriniń josparly jóndeýden ótpegendigine qaramastan, olardy paıdalaný áreketteri anyqtaldy. Osy ýaqytta prokýrorlar ortalyq kólik aımaǵyndaǵy josparly jóndeýden ótpegen 113 lokomotıvtiń jumysyn toqtatty. Al batys aımaqtyq prokýrorlary 1 myńnan astam sapasyz jóndeýden ótken vagondardyń qozǵalysyna tyıym saldy», dedi N.Súıindikov.
Onyń aıtýynsha, atalmysh salada temirjol tasymalyna qatysatyn keıbir qyzmetkerlerdiń biliktilikteriniń talapqa saı emestigi de anyqtaldy. Mysaly, Qostanaı qalalyq lokomotıv paıdalaný deposyndaǵy 54 jumysshynyń ózderiniń arnaıy bilimi bar ekendigin rastaıtyn qujattary jalǵan bolyp shyqty. «Qoryta kelgende, prokýratýra tekserýleriniń nátıjesinde 2 myńǵa jýyq vagondardy paıdalanýǵa tyıym salynyp, túrli deńgeıdegi jaýapqa 300-den astam adam tartyldy. Sonymen qatar prokýrorlardyń yqpal etýimen Kólik jáne kommýnıkatsııa mınıstrligi temirjol kólgi salasyndaǵy qaýipsizdikti qamtamasyz etý sharalaryn qataıtyp, ondaǵy eskirgen kólik quraldaryn esepten shyǵarý boıynsha júıeli jumystar júrgizilip jatyr», dedi resmı ókil.
