Temirjol salasynda qozǵalys qaýipsizdigin buzý jaǵdaıy eki ese azaıdy
ASTANA. QazAqparat - Sońǵy alty jylda «Qazaqstan temir joly» UK» AQ-da qozǵalys qaýipsizdigin buzý oqıǵalary azaıyp keledi, dep habarlaıdy QazAqparat «Qazaqstan temir joly» UK» AQ-nyń baspasóz qyzmetine silteme jasap.
Baspasóz málimetterine qaraǵanda jaǵdaıdyń bulaýshy bet alýyna 7 myń shaqyrym joldy qaıta jańǵyrtyp, 4 myń shaqyrym joldy kúrdeli jóndeýden ótkizýdiń arqasynda múmkin boldy.
Sonymen qatar, 397 lokomotıv satyp alyndy. 24854 júk jáne 1089 jolaýshylar vagondary satyp alyndy. Jańa dıagnostıkalyq qural jabdyqtardy óndiriske engizý arqyly vagondardyń 90 myńnan astam aqaýly qosalqy bólshekteri, 67 myńnan astam rels aqaýy anyqtaldy.
«Kompanııada jylma-jyl jazǵy mezgilde zamanaýı jol mashınalarymen joldy jaqsartý, jyldamdyǵyn kúsheıtý sharalary oryndalady»,- deıdi «QTJ» UK» AQ Óndiristik qaýipsizdik jáne ekologııa departamentiniń dırektory Aqbolat Jaǵyparov.
Onyń sózinshe, joldy dıagnostıkalyq quraldardy óndiriske engizip, sonymen jańǵyrtý kezeń-kezeńimen júrgizilýde. Ótken jyldan beri relstegi aqaýdy erte anyqtaı alatyn zamanaýı qurylǵy (jylyna 100 dana) satyp alyna bastady. Mobıldi dıagnostıkalyq keshen MDK avtomattandyrylǵan júıe arqyly joldyń aqaýly tustaryn kúrdeli jóndeýden ótkizýge múmkindik áperedi.
«2018-2019 jyldary osyndaı alty keshendi satyp alyp, barlyq magıstraldyq jelini avtomattandyrylǵan dıagnostıkalyq baqylaýǵa kóshemiz»,-deıdi A. Jaǵyparov.
«QTJ» UK» AQ qozǵalys qaýipsizdigin qamtamasyz etý maqsatynda joldy tekserý jumysyn avtomattandyrý men eńbekkerlerdiń kásibı biliktiligin kóterý jumystary júrgizilýde.
Keshendi jospardy júzege asyrý aıasynda jylma jyl 80 shaqyrym jol kúrdeli jóndeýden ótkiziledi. Jylyna 30 dana lokomotıv, 2000 júk jáne 80 jolaýshylar vagondary satyp alynady.
TMD-ǵa múshe memleketterdiń Temirjol kóligi keńesiniń (TJOK) málimetine qaraǵanda, «QTJ» UK» AQ qozǵalys qaýipsizdigin sırek buzatyn temirjol kóligi ákimshilikteri qatarynan sanalady.
TJOK quramyna Qazaqstan, Belarýs, Reseı, Lıtva, Qyrǵyzstan, Estonııa, Ýkraına, Tájikstan, Armenııa, Ázerbaıjan, Latvııa, Moldova, Grýzııa kiredi.
