Temirjol kóliginde qaýipsizdik normalarynyń buzylýy 13 paıyzǵa jetken
ASTANA. 21 qańtar. QazAqparat - 2011 jylǵy 21 qańtarda Qazaqstan Respýblıkasy Kólik jáne kommýnıkatsııa mınıstrliginiń Kóliktik baqylaý komıtetinde temirjol kóligindegi qaýipsizdik máseleleri boıynsha komıtet basshysy Ádilet Barmenqulovtyń tóraǵalyǵymen májilis bolyp ótti.
Otyrysqa kólik prokýratýrasynyń ókilderi, óńirlerdegi bas memlekettik kólik ınspektorlary, sondaı-aq, «Qazaqstan temir joly» ulttyq kompanııasy» aktsıonerlik qoǵamy, «Qamqor - Menedjment» jaýapkershiligi shekteýli seriktestigi, «Qaztemirtrans» aktsıonerlik qoǵamynyń ókilderi men jóndeý mekemeleriniń basshylary qatysty. Otyrys barysynda Á. Barmenqulov temirjol kóligindegi qaýipsizdik normalarynyń buzylýy 13 paıyzǵa artqanyn (631-den 713 deıin), sondaı-aq qozǵalys qaýipsizdigin qamtamasyz etýge áser etetin birqatar problemalar bar ekenin erekshe atap ótti. Sonymen qatar, ol temirjol jyljymaly quramyn jóndeý jáne onyń sapasyn jaqsartýda jańa tehnologııalardy qoldaný qajettiligine basa nazar aýdardy. Búginde temirjol kóliginde jyljymaly quramdy jóndeýmen 66 kásiporyn aınalysady, onyń ishinde 24-i jekemenshik bolyp tabylady.
Jóndeý kásiporyndaryn tekserýdiń 2010 jylǵy qorytyndysy týraly Kóliktik baqylaý komıtetiniń temirjol kóligindegi baqylaý basqarmasynyń bastyǵy Berik Іstleev baıandady. Onyń aıtýynsha, jóndeý kásiporyndary, ásirese, jekemenshik kompanııalar qazirgi tańda dıagnostıkalyq quraldarmen tıisti deńgeıde jabdyqtalmaǵan, sonyń saldarynan jóndeýdiń tehnologııalyq protsessi buzylýda.
Onyń ústine qosalqy bólshekterdiń jetispeýshiligi bar. Osy qosalqy bólshekterdiń tapshylyǵy jáne jóndeýdi kútý merziminiń tym uzaqtyǵy saldarynan jyljymaly quramnyń turyp qalýy belgilengen normadan asyp túsedi (30 táýlikke deıin).
Poıyzdarǵa qatysty jáne manevrlik jumystarda jiberilgen aqaýlardyń basty sebebi - jekemenshik jóndeý kásiporyndarynyń kesirinen jyljymaly quramdy jóndeý tehnologııasynyń buzylýy.
Árbir jóndeý mekemesinde 2010 jyly baqylaý men dıagnostıkanyń jańa ádisterin engizýdi esepke ala otyryp, jóndeýdiń sapasyn arttyrý boıynsha jospar ázirlendi. Jekemenshik jóndeý mekemelerine de osyndaı jospardy ázirleý, sondaı-aq, qosalqy bólshekter men kórsetiletin qyzmetter sapasyn baqylaý júıesin engizý tapsyryldy.
2010 jyly Komıtet júrgizgen tekserýlerdiń qorytyndysy boıynsha kólik qozǵalysynda 31 myńnan asa qaýipsizdik normalarynyń buzylǵany anyqtaldy. Soǵan sáıkes, 1806 akt jasalyp, 1371 buzýshylyqty joıý jóninde nusqaýlar berildi. Qozǵalys qaýipsizdigin buzǵany úshin 13 mıllıon 585 myń teńge kóleminde ákimshilik aıyppul salyndy. Qoryta kele, májiliske qatysýshylar temirjol jyljymaly quramyn jóndeýdiń sapasyn jaqsartý boıynsha jan-jaqty jospar daıyndaý týraly sheshim qabyldady. Jóndeý kásiporyndarynyń jáne «Qazaqstan temir joly» ulttyq kompanııasynyń basshylaryna temirjol jyljymaly quramynyń sapasyn jaqsartý boıynsha túbegeıli sharalardy júzege asyrý tapsyryldy.
