Temirjol kóligin paıdalaný aqysynyń 10 paıyzǵa ósýi - ózge de energııa kózderiniń qymbattaýymen baılanysty
ASTANA. Qańtardyń 5-i. QazAqparat /Aıdar Ospanalıev/ - Bıylǵy jylǵy qańtardyń 1-nen bastap temir jol kóligin paıdalaný quny 10 paıyzǵa qymbattady.
Jaǵdaıdyń bulaısha qalyptasýyn «Jolaýshylar tasymaly» aktsıonerlik qoǵamynyń ókilderi eldegi elektr energııasy, otyn, temirjol tasymalyna qajetti materıaldardyń qymbattaýymen baılanystyryp otyr. Bul týraly búgin atalmysh máselege baılanysty aqparat quraldarynyń ókilderimen arnaıy baspasóz máslıhatyn ótkizgen «Jolaýshylar tasymaly» aktsıonerlik qoǵamynyń Qarjy jónindegi vıtse-prezıdenti Baǵlan Qapııasheva málim etti, dep habarlaıdy QazAqparat.
Onyń sózine qaraǵanda, aktsıonerlik qoǵam ókilderi atalmysh sharany jolaýshylardy tasymaldaýdaǵy shyǵyndardy azaıtý maqsatynda qoldanyp otyr. «Árıne, jolaýshylar tasymalynyń shyǵyndary memleket tarapynan sýbsıdııalanady. Soǵan qaramastan biz Tabıǵı monopolııalardy retteý agenttigimen kelise otyryp, osyndaı sheshimge keldik. Agenttik ókilderi bizdiń shyǵyndarymyzdy túpkilikti teksere kele, usynysymyzdy qoldady», dedi vıtse-prezıdent.
Onyń aıtýynsha, temirjol arqyly qatynaý tarıfteri 2007 jyldyń aqpan aıynan bastap ózgermegen. Al ınflıatsııa bolsa, sol ýaqyttan beri 30 paıyzǵa deıin jetip, osyǵan qaraı aktsıonerlik qoǵamnyń shyǵyndary da artty. «Jalpy 10 paıyz kórsetkishke keletin bolsaq, atalmysh shara qoldanysqa engizilgen soń, jolaýshylar eń kóp júretin «Almaty-Astana» baǵytyndaǵy poıyzdardaǵy kýpelik vagondardyń jolaqysy 400 teńgege qymbattady. Al «Almaty-Aqtóbe» baǵytyndaǵy kýpelik oryndardyń jolaqysy 600 teńgege artady. Bizdiń búgingi tarıfterimiz TMD-ǵa múshe elderdiń tarıfterimen salystyrǵanda 2-2,5 esege arzan», dedi B.Qapııasheva.
Sondaı-aq ol sózinde «Jolaýshylar tasymaly» aktsıonerlik qoǵamynyń aldaǵy ýaqytta da óziniń jeke shyǵyndaryn azaıtýǵa kúsh salatyndyǵyn atap ótti. Bul rette vıtse-prezıdent atalmysh sharalardyń jumys sapasy men qozǵalys qaýipsizdigine áser etpeıtindigin jetkizdi.
