Temirjol boıynda qaraýsyz júrgen birneshe maldy poıyz qaǵyp ketti
Bul týraly QazAqparat Kóliktegi polıtsııa departamentiniń baspasóz qyzmetine silteme jasap habarlaıdy.
Pavlodar oblysynyń Maı-Jumysker jáne Jumysker-Kóktóbe aralyqtarynda birden eki osyndaı jaǵdaı boldy. Eki iri qara mal jolaýshylar jáne júk poıyzdarynyń astyna túsken. Temirjol kóliginiń josparlanbaǵan jalpy toqtaý ýaqyty 33 mınýtty qurady.
Osyǵan uqsas jaǵdaı Abaı oblysynyń Sýyqbulaq-RZD-6 aralyǵynda da boldy. Eki iri qara maldyń temirjol boıynda júrýine baılanysty júk poıyzy mashınısiniń shuǵyl tejeý qoldanýyna týra keldi.
Mal ıelerine qatysty QR ÁQBtK 559-baby, ıaǵnı temirjoldardyń bólingen jolaǵynda mal jaıý qaǵıdalaryn buzý boıynsha ákimshilik hattama toltyryldy.
Sondaı-aq, Qaraǵandy oblysynyń Qyzyljar-Jeńis aralyǵynda úsh jylqy, al Shymkent stantsııasynda úsh usaq mal júk poıyzynyń astyna túsken. Poıyzdardyń turaǵy eki jaǵdaıda da 11 mınýtty qurady.
«Atalǵan faktiler boıynsha da úı janýarlarynyń ıelerine ákimshilik hattamalar toltyryldy»,-delingen habarlamada.
Kólik polıtseıleri turǵyndarǵa temirjol mańynda úı janýarlaryn jaıý kezinde qaýipsizdik sharalaryn saqtaý kerektigin taǵy da eske saldy.
