Temirjol bıletteriniń 70 paıyzy onlaın satyp alynady

NUR-SULTAN. QazAqparat – Búgingi tańda qazaqstandyqtar temirjol bıletteriniń 70 paıyzyn ınternet arqyly satyp alady. Bul kórsetkish ótken jylmen salystyrǵanda 16 paıyzǵa artyq, dep habarlaıdy QazAqparat Indýstrııa jáne ınfraqurylymdyq damý mınıstrligine silteme jasap.

Jol júrý qujattarynyń onlaın satylymy, ásirese karantındik shekteýler alynyp tastalǵannan keıin aıtarlyqtaı ósken.

«2019 jylǵy shilde aıynan bastap ulttyq tasymaldaýshy kompanııa temirjol bıletterin satýdy tolyǵymen «Mobıýs» elektrondy júıesine aýystyrdy. Bul bastama óz kezeginde ótkizý arnalaryn aıtarlyqtaı keńeıtýge múmkindik berip, azamattar úshin bıletterdi satyp alý sharttaryn jaqsartýǵa áser etti», - delingen mınıstrlik málimdemesinde.

Qazir temirjol bıletteri «QTJ» UK» AQ-na tıesili 164 kassa, 3 myń kassa agenttigi men poshta bólimshesi, 15 ınternet saıt pen mobıldik qosymsha (onyń ishinde bilet.railways.kz saıty men «QTJ bıletteri» mobıldik qosymshasy) jáne 30 myń ózine-ózi qyzmet kórsetý avtomattary arqyly satylady.

2022 jyldyń alǵashqy tórt aıynda «Kútý paraǵy» qyzmeti arqyly 18 myńnan astam bılet rásimdelgen. Bul kórsetkish ótken jyldyń sáıkes kezeńimen salystyrǵanda 3,5 ese kóp.

Aıta ketsek, 23 mamyrda elimizdiń óńirlerindegi shalǵaı jatqan stantsııalar men razez turǵyndaryna medıtsınalyq qyzmet kórsetý úshin arnaıy poıyzdar jolǵa shyǵady.