Temirjol bıletterin satýdyń jańa júıesi engiziledi
Jemqorlyqqa qarsy saıasat departamentiniń dırektory Danııar Sabyrbaevtyń aıtýynsha, byltyrdan beri temirjolmen jolaýshylardy tasymaldaý salasynda aýqymdy tekserister uıymdastyryldy. Sonyń nátıjesinde kóptegen zań buzýshylyqtar anyqtaldy.
«Birinshiden, jumysqa alý boıynsha sybaılas jemqorlyqtyń qaýpi joǵary. Sebebi barlyq qujattar qaǵaz júzinde júrgiziledi. Elektrondy testileý áli kúnge deıin joq. Budan bólek, sybaılas jemqorlyqqa qatysty shekteýler de, qyzmet kórsetý standarttary da engizilmegen» - dedi D.Sabyrbaev Astanada ótken baspasóz máslıxatynda.
Onyń sózine qaraǵanda, temirjol bıletterin zańsyz satý salasynda da tártip joq. Byltyr eki aıdyń ishinde qoǵamdyq baqylaýdyń nátıjesinde zańsyz bılet satýdyń barlyq tizbegi anyqtaldy.
«Bylaısha aıtqanda, kassada bılet joq deıdi de, ózderi jasyryn bılet satyp otyrady. Zańsyz bılet satý sxemasyna vokzal qyzmetkerlerinen bastap temirjol kúzeti men poıyz bastyǵyna deıin kiredi. Negizi, brondaý qyzmeti bıletterdi erkin saýdadan shyǵaryp, jasyryn satýǵa múmkindik berip otyr», - dep atap kórsetti D.Sabyrbaev.
Búginde «Qazaqstan temirjoly» AQ-sy bıletterdi ASÝ «Ekspress» avtomatty júıesi arqyly satyp otyrady. Atalǵan júıe 1972 jyly engizildi.
«Demek, Qazaqstan temirjoly 47 jyl buryn jasalǵan bıletterdi satý júıesin qoldanyp keledi. Atalǵan júıe birde-bir memlekettik bazaǵa qosylmaǵan. Qansha bılet alamyn deseń, óz erkiń. Osyny alypsatarlar da paıdalanyp otyr. Bıletti kóptep satyp alady da, jolaýshylarǵa qymbatqa satady. Buǵan deıin jańa júıeni engizý máselesi kóterilgen. Quziretti memlekettik organ da tapsyrma berdi. Alaıda Qazaqstan temirjoly tıisti sharalardy qolǵa alǵan joq. Atalǵan mekemege bıletterdi satýdyń jańa júıesin engizý kerek. Onsyz alypsatarlyq tolastamaıdy», - deıdi D.Sabyrbaev.
Búgingi baspasóz máslıxatyna «Jolaýshylar tasymaly» AQ bas dırektorynyń orynbasary Danııar Nurmaǵambetov te qatysty. Onyń aıtýynsha, 1972 jyldan beri ASÝ «Ekspress» júıesi bir-aq ret jańartyldy. 2000 jyly birshama ózgerister engizildi. Degenmen, búginde atalǵan júıe eskirdi. Ony texnık mamandar da rastap otyr.
«Iá, bılet satý júıesi eskirgennen keıin maxınatsııa jasaý joldary kóbeıip otyr. Ózimizdiń qyzmetkerlerimiz bar, jeke menshik kassalar bar. Biz ony da jaqsy bilemiz. Aldaǵy ýaqytta biz jańa júıeni engizýdi kózdeımiz. Ol úshin sheteldik tájárıbeni zerdelep shyqtyq. Jospar boıynsha osy jyldyń aıaǵyna deıin biz jańa júıeni pılottyq rejımde synap kóremiz. Sodan keıin engizetin bolamyz. Budan erte jasaı almaımyz», - deıdi D.Nurmaǵambetov.