Temirjol bıletterin satýdyń balama joldary, sonyń ishinde ınternet-resýrstar arqyly satý «Temirjol kóligi týraly» Zańymen rettelgen - QR KKM

ASTANA. 1 tamyz. QazAqparat - Temirjol bıletterin satý, jol júrý qujattarynyń merzimin uzartý jáne bılet kassalarynyń jumys erejesin buzǵany úshin temirjol kóligi qyzmetkerlerine artylar jaýapkershilik zańmen kúsheıtilgen. Nátıjesinde salynatyn aıyppul kólemi jeke tulǵalar úshin 20-25 aılyq eseptik kórsetkishti, al zańdy tulǵalar úshin 40-50 aılyq eseptik kórsetkishti quraıtyn boldy. Bul týraly QR KKM baspasóz qyzmetinen habarlandy.

Endigi jerde temirjol kóligi arqyly júk tasymaldaý qyzmetine lıtsenzııa alý qajet. Osyǵan oraı, temirjol kóliginde qozǵalys qaýipsizdigin qamtamasyz etý úshin «Lıtsenzııalaý týraly» QR Zańyna sáıkes ózgertý engizilip otyr.

Aǵymdaǵy jyldyń 4 maýsymynda qabyldanǵan «QR Keıbir zańnamalyq aktilerine kólik máseleleri jóninde ózgertýler men tolyqtyrýlar engizý týraly» QR zańyna engizilgen osy jáne ózge de normalar ulttyq júk jáne jolaýshylar tasymaldaýshylardyń mártebesin zań deńgeıinde bekitýge jáne respýblıka zańdaryn halyqaralyq normalarmen úndestirýge baǵyttalǵan.

Sonymen, qaýipsizdikti basqarý jáne ony baqylaý júıesin engizýdi kózdeıtin normanyń zańmen qabyldanýyna baılanysty, endigi jerde jolaýshylar men júk tasymaldaýshylar onyń kórsetip otyrǵan qyzmeti qaýipsizdik talaptaryna tolyq saı ekenin dáleldeıtin júıeni ornatýǵa mindetti.

Sondaı-aq, temirjol vokzaldaryn tehnıkalyq jaraqtandyrýǵa jáne qyzmet kórsetý deńgeıin arttyrýǵa baǵyttalǵan normalar da engizilgen bolatyn. Bul normalar temirjol vokzaldarynyń sanattylyǵyn aıqyndaıdy, soǵan oraı, vokzaldarda kórsetiletin mindetti qyzmetterdiń kólemi anyqtalady.

Budan basqa avtokólikterdiń jolaýshylar úshin qoljetimdi bolýyn qamtamasyz etý maqsatynda vokzal mańyndaǵy aýmaqqa jaýapkershilikti vokzal ákimshiligine bekitip berý kózdelip otyr.

Zańda múmkindigi shekteýli jandardyń vokzal ǵımaratyna kedergisiz kirip shyǵýyn qamtamasyz etý úshin arnaıy qondyrǵylarmen jabdyqtaýdy (pandýs, daýys zoraıtqyshtar, anyqtamalyq tablo, Braıl álippesin qoldaný arqyly beriletin aqparattar) vokzal ákimshiligine mindettelgen.

Munyń syrtynda, Kóliktik ınfraqurylymyn damytýdyń 2014 jylǵa deıingi baǵdarlamasy aıasynda ınfraqurylym operatoryn qurý jáne oǵan magıstraldi temirjol jelisin berý kózdelgen.