Temirjan Dáýlet júldesin Jambyl oblysyndaǵy jarylystan zardap shekkenderge arnady

TOKIO. QazAqparat – Tokıodaǵy Paralımpıada oıyndarynyń kúmis júldegeri Temirjan Dáýlet Jambyl oblysyndaǵy jarylys saldarynan qaıtys bolǵandardyń úı ishine kóńil aıtty, dep habarlaıdy QazAqparat tilshisi.

Tokıoda ótip jatqan Paralımpıada oıyndarynda dzıýdo kúresinen kúmis medal alǵan Temirjan Dáýlet júldesin el táýelsizdiginiń 30 jyldyǵy men Jambyl oblysyndaǵy jarylystan zardap shekkenderge arnaıtynyn aıtty.

«Osy júldemdi Qazaqstannyń táýelsizdigine arnaımyn. Jambyl oblysyndaǵy oqys oqıǵa saldarynan adamdar qaıtys bolyp, birtalaı adam jaraqat aldy. Birneshe otbasy tireginen aıyryldy. Júldemdi solarǵa arnaımyn. Alla taǵala olarǵa sabyr bersin», - dedi sportshy.

Eske salsaq, Tokıoda ótip jatqan Paralımpıada oıyndarynda qazaqstandyq paradzıýdoshy Temirjan Dáýlet kúmis medal ıelengen bolatyn.

73 keli salmaq dárejesi boıynsha fınalynda ózbekstandyq Ferýz Saıdov qazaqstandyq sportshyny ıppon ádisimen jeńip ketti. Temirjan Dáýlet jartylaı fınalda grýzın Georgıı Kaldanıdi ıppon ádisimen jeńgen edi.