Temirtaýlyq tergeýshi qylmystyq isti toqtatý úshin kúdiktiden aqsha alǵan

NUR-SULTAN. QazAqparat – Temirtaý qalasynda tergeýshi qylmystyq iske núkte qoıý úshin kúdiktiden 500 myń teńge para alǵan. Bul týraly «El namysy» arnaıy monıtorıngilik tobynyń múshesi Dıdar Smaǵulov málim etti, dep habarlaıdy QazAqparat tilshisi.

«Biz qoǵamdyq baqylaý jumysyna ótken jyldyń qazan aıynan bastap kiristik. 6 aıdyń ishinde belgili bir deńgeıdegi nátıjege qol jetkizdik. Bizdiń jumysymyzdyń basty baǵyttarynyń biri — halyqqa tegin zańgerlik keńes berý. Jasyratyny joq, halyqtyń zań jaǵynan saýatynyń taıazdyǵyn keıbir sheneýnikter qyzmet babynda paıdalanady. Mysaly, Qaraǵandy oblysy Temirtaý qalasynda Shyǵys polıtsııa bólimshesiniń tergeýshisi qylmystyq isti toqtatý úshin kúdiktiden 500 myń teńge talap etken. Al zań júzinde atalǵan qylmystyq is toqtatýǵa jatqan. Amaly qalmaǵan kúdikti bizge habarlasty. Óz kezegimizde sybaılas jemqorlyqpen kúres qyzmetin tarta otyryp azamatqa zańdyq turǵydan tıisti keńes berildi», - dedi Dıdar Smaǵulov Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, tergeýshi joǵaryda atalǵan somany alý barysynda ustalǵan.

«Bul jerde tergeýshi kúdiktiniń zańdy asa bilmeıtinin paıdalanyp otyr jáne qyzmetin asyra paıdalanyp otyr. Búginde is sotqa jiberildi, odan ári sot sheshimin kútemiz», - deıdi ol.

Buǵan deıin habarlaǵanymyzdaı bıyl elimizde «El namysy» atty arnaıy monıtorıngilik top quryldy.

Atalǵan qoǵamdyq uıymnyń maqsaty – Prezıdent tapsyrmalarynyń oryndalý barysyn baqylaý.