Temirtaýlyq sportshy halyqaralyq ýltramarafonda jeńiske jetti

TEMІRTAÝ. QazAqparat – Temirtaýlyq sportshy Zahar Býshınov halyqaralyq táýliktik ýltramarafonda jeńiske jetti. Ol 24 saǵat ishinde 153 km júgirdi, dep habarlaıdy QazAqparat tilshisi.

Jarys elordalyq «Astana» trıatlon-parkinde ótti. Oǵan Qazaqstan, Reseı, Qyrǵyzstan, Ózbekstan jáne basqa elderdiń sportshylary úsh jas sanatynda qatysty.

Zahar Býshınov 18-35 jas aralyǵyndaǵy topta birinshi oryndy ıelendi. Ol A.Moldaǵulova atyndaǵy mamandandyrylǵan mektep-ınternatynyń tárbıelenýshisi, 400 jáne 800 metrge júgirýde jeńil atletıkadan halyqaralyq starttardyń júldegeri jáne jeńimpazy. Jabyq úı-jaılarda 4-ten 400 m-ge deıin estafetalyq júgirýde rekordshy. 2012 jyly áýesqoı sportqa aýysty.

«Jeńil atletıkamen 2002 jyldan beri aınalysamyn. Men táýliktik júgirý týraly bir aı buryn bildim. Kóp daıyndalmadym. Marafondy biz Astana saıabaǵynda kılometrlik sheńbermen júgirdik. Túnde óte qıyn boldy. Kóbisi shydaı almady jáne qashyqtyqtan ketti. Nátıjesinde ár jas sanatynda úsh júldeger anyqtaldy. Osyndaı marafondarǵa qatysýdy jalǵastyrýdy josparlap otyrmyn», – deıdi Zahar Býshınov.

Jeńimpazdar men júldegerlerge kýboktar, medaldar men dıplomdar tabystaldy.