Temirtaýlyq oqýshy bıyl kúzde 70-ten astam tal ekti
TEMІRTAÝ. QazAqparat – Temirtaýlyq on eki jasar ekobelsendi Andreı Plotnıkov bıyl kúzde 73 aǵash otyrǵyzdy. №16 jalpy bilim beretin mektep oqýshysy – «Otrajenıe» ekologııalyq qoǵamdyq birlestiginiń belsendisi, dep habarlaıdy QazAqparat tilshisi.
Birlestik jetekshisi Elena Varganovanyń aıtýynsha, Andreı – úlgi tutar bala. Balanyń bastamasyn onyń otbasy qoldaıdy.
«Andreı bizdiń qalamyzda ótetin barlyq ekologııalyq aktsııaǵa qatysady. Barlyǵyna qyzyǵýshylyq tanytyp, óz kómegin usynady. Eki jyl buryn Andreı atasymen birge 30 qaraǵaı kóshetin ákeldi. Olardyń jartysy tamyrlandy. Osy kúzde ol emen jańǵaǵy men 20 emen kóshetin ákeldi. Olardy ózi otyrǵyzdy. Biz aǵashtarǵa birge qamqorlyq jasaımyz jáne baptaımyz. Plotnıkovtar otbasyna balaǵa qoldaý kórsetkeni jáne jaqsy tárbıelegeni úshin alǵys aıtamyn», – deıdi Elena Varganova.
Andreı qalanyń ekologııalyq ómirine inisi Artemdi jáne onyń barlyq synyptasyn tartady. Sheberlik sabaqtaryn, sonyń ishinde plastıkti irikteý boıynsha sabaqtar ótkizedi. Bala Nura ózeniniń jaǵalaýyn tazartý aktsııasyna da qatysty.
«Men ekologııa máselesimen eki jyldan beri aınalysyp kelemin. Adamdar tabıǵatqa zııan tıgizbeýi úshin aınalamyzdaǵy álem taza bolýy úshin úlesimdi qosqym keledi. Bizge taza aýa úshin aǵashtar qajet, sondyqtan men olardy otyrǵyzǵandy unatamyn. Bolashaqta ekolog bolǵym keledi», – dedi Andreı.
