Temirtaýlyq egiz boıjetken: Kimge daýys bergenimizdi bir-birimizge de aıtpaımyz

TEMІRTAÝ. QazAqparat – Metallýrgter qalasynda egiz boıjetken saılaý ýchaskesine kelip, daýys berdi. Metallýrgter qalasynda bıyl 18 jasqa tolǵan 2 myńnan astam jas turǵyn tizimge endi, dep habarlaıdy QazAqparat tilshisi.

Abzal Ermekbaev bıyl alǵash ret saılaýǵa qatysty. Ol - Temirtaý polıtehnıkalyq kolledjiniń stýdenti.

Abzal turǵylyqty jeri boıynsha № 317 ýchaskede óziniń azamattyq boryshyn oryndaǵan.

«Búgingi is-shara óte mańyzdy. Árkim kelip, daýys berýi kerek. Meniń qurdastarym men týystarym búgin kelip, Qazaqstannyń bolashaǵy úshin daýys beredi», - deıdi Abzal Ermekbaev.

№ 317 ýchaske óziniń saılaý aldyndaǵy jumysyn 20 qazanda bastaǵan.

Oǵan eki myńnan astam adam bekitilgen. Kúni boıy daýys berýshilerdiń kelýi 85% quraıdy dep josparlanýda.

Zeınetkerler men múmkindigi shekteýli jandar úshin kóshpeli brıgadalar uıymdastyryldy.

«Búgingi tańda 11 baıqaýshy otyr. Barlyǵy kóterińki kóńil-kúımen kelip jatyr, aýa raıy da keremet. Bir saǵat ishinde 100-den astam adam daýys berdi. Saılaý aldyndaǵy úgit bir aı boıy óte belsendi júrdi», - dep atap ótti №317 ýchaskelik komıssııanyń tóraǵasy Jomart Tilemisov.

Al №324 saılaý ýchaskesine egiz qyzdar Amına men Adına Ibraeva keldi.

Olar osymen úshinshi ret daýys berýge qatysyp otyrǵanymen, kimge daýys bergenin bir-birinen qupııa ustaıtynyn aıtady.

«Saılaýǵa qatysý - Qazaqstannyń árbir azamatynyń azamattyq boryshy dep sanaımyn. Men adal saılaýdy qoldaımyn jáne meniń tańdaýym durys boldy dep úmittenemin», - deıdi Amına Ibraeva.

Saılaý kúni metallýrgter qalasynda 59 saılaý ýchaskesi jumys isteıdi.

Temirtaý boıynsha saılaýshylar tiziminde 18 jasqa endi tolǵan jastardyń sany - 2175 adam.