Temirtaýǵa qara qar jaýmaıtyn boldy
QARAǴANDY. QazAqparat - Temirtaý qalasynyń ekologııalyq jaǵdaıyn jaqsartý boıynsha 2018-2020 jyldarǵa arnalǵan Keshendi jospar bekitildi, dep habarlaıdy QazAqparat Qaraǵandy oblysy ákimdigine silteme jasap.
Esterińizne sala keteıik, «qara qarmen» baılanysty jaǵdaıdan soń Qaraǵandy oblysynyń ákimi Erlan Qoshanov metallýrgter shaharyndaǵy ekologııany jaqsartýǵa baǵyttalǵan sharalar keshenin qurý týraly tapsyrma bergen bolatyn. Basty shart júıeli ádister qurý. Qujat jobasyna óz usynystaryn derbes ekologtar men Temirtaý qalasynyń belsendi top músheleri engizdi. Jospardy oryndaý monıtorıngi toqsan saıyn ótkizilip otyrady. Ár tarmaq boıynsha jaýapty taraptar anyqtalǵan.
Josparǵa iri ónerkásip kásiporyndarynyń atmosferaǵa lastaýshy zattardyń shyǵarýyn tómendetý boıynsha sharalar engizilgen.
Tazartý qurylǵylaryn qaıta qalypqa keltirý jáne ornatý, óndiristi jańǵyrtý jáne taǵy basqa máseleler qarastyrylǵan.
Qalada energııa únemdeýdi joǵarylatý, qaldyqtardy basqarý jáne sý resýrstaryn qorǵaý boıynsha sharalar eskerilgen. Keshendi jospar sharalarynda statsıonarlyq kózderden atmosferaǵa shyǵatyn lastaýshy zattardyń jiberilýin 82,7 myń tonnaǵa deıin, jyljymaly kózderden 15-20% deıin, kúkirt sýtektiń shyǵarylýyn 30% deıin, qaldyqtardyń qoımalanýyn jylyna 1,3 mln tonnaǵa deıin tómendetý kózdelgen.
Sondaı-aq qalanyń dendrologııalyq jospary qurylady. Temirtaýda jasyl jelekterdiń sanyn anaǵurlym ulǵaıtý josparlanyp otyr.
Josparǵa qorshaǵan ortanyń jaǵdaıyna qoǵamdyq baqylaý jasaýǵa baǵyttalǵan sharalar engizilgen.
