Temirtaýdyń toǵyz turǵyny «Órleý» syılyǵyna ıe boldy

TEMІRTAÝ. QazAqparat – Temirtaýda ekinshi jyl qatarynan belsendi názik jandarǵa «Órleý» syılyǵy tabystalýda. Bul joly qala ákiminiń arnaıy marapatyna toǵyz áıel usynyldy, dep habarlaıdy QazAqparat tilshisi.

Syılyq ózderiniń joǵary kásibı deńgeıin kórsetken jáne qalanyń qoǵamdyq-saıası ómirine belsendi aralasqan Temirtaý turǵyndaryna tabystalady.

Marapatqa úmitkerlerdi arnaıy komıssııa tańdady. Toǵyz laýreattyń árqaısysy óz salasynda erekshelendi – bul óndiris, bilim berý, densaýlyq saqtaý, memlekettik basqarý, mádenıet, sport, qyzmet kórsetý, bıznes, ana bolý.

«Mádenıet salasynyń úzdigi» nomınatsııasy boıynsha Temirtaý mádenıet saraıynyń «Alaý» ansambliniń jetekshisi Zeınegúl Egizekovaǵa berildi.

«Men «Alaý» ansamblimen 22 jyldan beri jumys istep kelemin. Osy ýaqyt ishinde men kóptegen alǵys pen maqtaý qaǵazdaryn aldym. Biraq bul syılyq men úshin úlken tosyn syı boldy. Mundaı syılyq ár áıel úshin qajet jáne mańyzdy. Basshylyqtyń jumysymyzdy baıqaǵany, bizdiń tek ózimiz úshin ǵana emes, bolashaq urpaq úshin de eńbek etetinimizdi túsingeni qýantady», – deıdi Zeınegúl Egizekova.

«Óndiristi damytýdaǵy jetistikteri úshin» nomınatsııasyna Temirtaý elektrometallýrgııalyq kombınatynyń № 4 peshi basqarý pýltiniń operatory Marına Shatrova laıyqty dep tanyldy. Óndirýshiniń jalpy eńbek ótili 40 jyl, onyń 35-i TEMK-de jumys isteýmen ótken.

«Men eńbek áýletinen shyqqanmyn, óndiriste adamdarmen jumys istegendi unatamyn. Bul ekinshi týǵan úıim desem de bolady. Men osy bedeldi syılyqpen marapattalǵanyma qýanyshtymyn. Bizde mundaı syılyqqa laıyq áıelder kóp. Jyl saıyn nomınatsııalar men jeńimpazdar kóbeıe bersin!» – dep tilegin bildirdi Marına Shatrova.

Nomınanttar 200 myń teńgege syılyq sertıfıkattarymen jáne dıplomdarmen marapattaldy.