Temirtaýdyń ekologııasyn jaqsartýǵa 50 mlrd teńge qarastyrylady
Temirtaýdyń ekologııalyq ahýalyn jaqsartýǵa qatysty másele bılik, bıznes, qoǵam, ekologtar jáne halyqaralyq sarapshylar ókilderiniń kezdesýi barysynda talqylandy.
«Biz birneshe ret kezdesip, birlese otyryp Temirtaýdaǵy ekologııany jaqsartý máselelerin talqylaǵan bolatynbyz. Memlekettik organdar, táýelsiz ekologtar, bastamashy toptardyń músheleri engen jumys toby qurylǵan bolatyn. Jaǵdaıdy zertteý boıynsha belgili-bir jumystar júrgizildi, sonyń nátıjesinde ekologııalyq jaǵdaıdy jaqsartýdyń keshendik josparynyń jobasy quryldy - biz búgin ony ortaǵa salyp otyrmyz», - dedi Qaraǵandy oblysynyń ákimi Erlan Qoshanov kezdesý barysynda.
Aımaq basshysy Qazaqstannyń ekologııalyq uıymdar qaýymdastyǵyna qorshaǵan ortanyń problemalaryn sheshýge atsalysqany úshin alǵysyn bildirdi. Astanadaǵy qoǵamdyq uıymnyń kómegine Temirtaý turǵyndarynyń bastamashy toptary júgingen bolatyn. Olar qaladaǵy nashar ekologııalyq jaǵdaıdy aıtyp shaǵym jasaǵan.
Keshendik jospar úsh jyldyq merzimge shaqtalǵan - 2020 jylǵa deıin. Ol 8 bloktan quralady, onyń árqaısysy naqty sharalardan turady. Baǵyttar ártúrli: qorshaǵan ortanyń jaǵdaıyn baqylap, kógaldandyrýdan basap, óndiristik jabdyqtardy qalpyna keltirý men qaldyqtardy basqarý jaǵy qarastyrylǵan. Basty maqsat - ónerkásiptik qalany taza jáne turǵyndar densaýlyǵy úshin qaýipsiz etý.
Joba jasaýshylardyń esebi boıynsha keshendik jospardyń barlyq sharalaryn júzege asyrý 50 mlrd teńgeden astam qarajatty qajet etedi. Ony túrli kózderden qarjylandyrý josparlanyp otyr. Respýblıkalyq, oblystyq jáne jergilikti bıýdjetten, kásiporynnyń ınvestıtsııalary men jeke qarajattary, BUU DB nesıeleri men granttaryn tartý kózdelgen.
Qaladaǵy qorshaǵan ortany basty lastaýshy «ArselorMıttal Temirtaý» kompanııasy úsh jylda tabıǵatty qorǵaý sharalaryna 6,5 mlrd teńge berýdi josparlap otyr.
Jasyl beldeýdi damytý blogynda tek aǵash otyrǵyzý ǵana emes, sonymen qatar Temirtaýdyń dendrologııalyq josparyn qurý qarastyrylǵan.
Dóńgelek ústeldiń qatysýshylary jobaǵa qatysty óz pikirlerin aıtyp, usynystaryn engizdi.
«Bul sońǵy nusqa emes, jospardyń jobasy áli de ashyq. Sizdermen birge tolyqtyratyn bolamyz», - dep atap ótti Erlan Qoshanov.
Aımaq basshysy keleshekte osyndaı keshendik josparlar oblysymyzdyń barlyq ónerkásiptik qalalarynda da qurylatynyn atap aıty.
Qaraǵandy oblysynyń ákimdigi jáne Qazaqstannyń ekologııalyq uıymdarynyń qaýymdastyǵy ózara áriptestik týraly memorandýmǵa qol qoıdy.
Esterińizge sala keteıik, qysta Temirtaýda qara tústi qar jaýyp, soǵan baılanysty qoǵamdyq rezonans týyndaǵan edi. Ákimshilik ókilderi máseleden shet qalmady. Oblys ákimdiginde ekologııalyq jaǵdaıdy zertteýge qatysty jumys toby qurylyp, jaǵdaıdy jaqsartýdyń keshendik jospary quryla bastady.
