Temirtaýdaǵy JEO-2-da qyzmetkerdiń qaza tabýyna qatysty qylmystyq is qozǵaldy
QARAǴANDY. QazAqparat - «ArselorMıtall Temırtaý» kompanııasyna qarasty JEO-2 mashınısi kómekshisiniń qaza tabýy faktisi boıynsha QR QK «Eńbekti qorǵaý qaǵıdalaryn buzý» 156-baby boıynsha sotqa deıingi tergeý jumystary bastaldy, dep habarlaıdy «QazAqparat» HAA tilshisi.
«Quqyq qorǵaý organdary qylmystyq isti tergeý jumystaryn bastady. Al biz kólik-janarmaı tsehynda júk túsirý jumysy barysynda qaýipsizdik tehnıkasy erejeleriniń buzylǵan-buzylmaǵanyn anyqtaımyz. Komıssııa jumys jasaýda», - dep habarlady eńbek departamentinde.
Qylmystyq is barysynda aýdarǵysh-vagonnyń 57 jasar mashınısi jaýap berýde. Qaza tapqan 24 jastaǵy Jan Erjanovtyń ata-anasymen turatyndyǵy jáne boıdaq ekeni belgili boldy.
Eske salaıyq, «ArselorMıtall Temırtaý» AQ-ǵa qarasty JEO-2 aýmaǵyndaǵy kólik-janarmaı tsehynda mashınıstiń kómekshisi qaza tapty. Ony aýdarǵysh-vagon basyp qalǵan.
