Temirtaýdaǵy turmysy tómen otbasylarǵa gazdandyrý kezinde bir rettik kómek kórsetiledi

TEMІRTAÝ. QazAqparat – Temirtaýdyń áleýmettik qorǵalatyn sanattaǵy turǵyndaryna úılerdi gazǵa qosý kezinde materıaldyq kómek kórsetiledi. Bir jolǵy áleýmettik tólem zeınetkerler, múmkindigi shekteýli turǵyn úı ıeleri, múgedek balalary bar, sondaı-aq kóp balaly otbasylarǵa beriledi, dep habarlaıdy QazAqparat tilshisi.

Bir jolǵy áleýmettik tólemdi alý úshin atalǵan sanattaǵy ókilder Temirtaý qalasynyń jumyspen qamtý jáne áleýmettik baǵdarlamalar bólimine ótinish berýi qajet. Bul rette kelesi qujattardy usyný tıis:

1) jeke basyn kýálandyratyn qujat;

2) gaz jabdyǵyn jetkizýmen jáne ornatýmen baılanysty tulǵanyń (otbasynyń)shyǵystaryn rastaıtyn akt jáne/nemese qujat (chekterdiń, túbirtekterdiń kóshirmeleri, qyzmetter kórsetýge arnalǵan shart);

3) adamnyń (otbasy músheleriniń) tabystary týraly málimetter;

4) mártebesin rastaıtyn qujattyń kóshirmesi (zeınetaqy kýáligi, múgedektigi týraly anyqtama, balalardyń týý týraly kýáligi);

5) jyljymaıtyn múlikke tirkelgen quqyqtardyń joq (bar) ekendigi týraly anyqtama;

6) Ekinshi deńgeıdegi banktegi ne «Qazpochta» aktsıonerlik qoǵamyndaǵy bank shotynyń nómiri týraly málimetter.

«Biz turǵyndardy tabıǵı gazǵa qosý úshin gaz taratý jelilerin júrgizemiz. Shyǵyndardy óteý úshin jumyspen qamtý jáne áleýmettik baǵdarlamalar bólimi 130 AEK-ke deıin birjolǵy áleýmettik kómek kórsete bastady», – dedi Temirtaý ákimi Qaırat Begimov.

Aıta ketý kerek, búginde Temirtaýda 80 shaqyrymnan astam gaz taratý jelisi salyndy. 900-ge jýyq úı qosylýǵa qol jetimdi.

Qosymsha aqparat alý úshin Temirtaý qalasy, Chaıkovskıı kóshesi, 22, 3-kabınette ornalasqan Temirtaý qalasynyń jumyspen qamtý jáne áleýmettik baǵdarlamalar bólimine habarlasýǵa bolady. Telefony: 95-55-55.