Temirtaýdaǵy sábıdiń ólimi: Dárigerlerdiń áreketinde buzýshylyq anyqtaldy
QARAǴANDY. QazAqparat - Komıssııa Temirtaýdyń ortalyq aýrýhanasyndaǵy bir jarym jasar balanyń ólimine ne sebep bolǵanyn anyqtady, dep habarlaıdy «QazAqpara»t HAA tilshisi.
«Temirtaý ortalyq aýrýhanasynyń ınfektsııalyq bólimshesi personalynyń medıtsınalyq qyzmet kórsetýi kezinde kemshilik anyqtaldy. QR QK-niń 317-baby 3-bóliginde qarastyrylǵan quqyqbuzýshylyqtyń (medıtsına qyzmetkerleriniń kásibı mindettemelerin tıisti deńgeıde oryndamaý) belgileri zerttelip jatyr. Materıaldardy tereń túrde zertteýdiń qorytyndysy boıynsha, komıssııa kelesideı sheshimge keldi: Aslan Manasovtyń ólimi bas mıynyń isinýi, munyń artynsha ishki aǵzalardyń tútikshelerin vırýstardyń zaqymdaýy saldarynan bolǵan», - deıdi Qaraǵandy oblysynyń qoǵamdyq densaýlyq saqtaý departamentiniń basshysy Olga Smırnova.
Atalyp ótkendeı, komıssııa barynsha ashyq túrde, Aslan Manasovtyń ata-anasynyń qujattarmen tanysý múmkindigine jol asha otyryp jumys júrgizgen. Komıssııa qujaty Temirtaý qalasynyń ІІB-ne joldanǵan.
Eske sala ketsek, 2018 jyldyń 3 qańtarynda Temirtaý ortalyq aýrhanasynyń ınfektsııalyq bólimshesine jedel járdemmen jetkizilgen bir jarym jastaǵy Aslan Manasov sol kúni shetinegen bolatyn. Balanyń anasy Maqpal Jarylqasynovanyń aıtýynsha, dárigerler balany jansaqtaý bólimine jatqyzyp, jiti túrde em júrgizý ótinishin eleýsiz qaldyrǵan. Osy jaǵdaıǵa baılanysty Temirtaýdyń ortalyq aýrýhanasy men Qaraǵandy oblysynyń ınfektsııalyq aýrýhanasynyń basshylary tártiptik jaýapkershilikke tartyldy.
