Temirtaýdaǵy ónerkásip aımaǵynan órt shyqty
QARAǴANDY. QazAqparat - Temirtaýda qaıtalama shıkizatty qabyldaý jáne qaıta óndirýmen aınalysatyn ónerkásiptik aımaqtan órt shyqty, dep habarlaıdy QazAqparat tilshisi.
«10 shilde kúni keshki saǵat 8-00-der shamasynda órt shyqqany týraly habar kelip tústi. Qaıtalama shıkizatty qabyldaý jáne qaıta óndeý isimen aınalysatyn ónerkásiptik aımaqtyń shyǵys bóligi órtengen. Birden 6 konteıner men olardyń janyndaǵy jıhazdar, sondaı-aq, eki júk kóligi otqa oranǵan», - dedi Qaraǵandy oblystyq Tótenshe jaǵdaılar departamentiniń baspasóz hatshysy Janna Dáýrenbekova.
Ǵımarattyń 339 sharshy metr aýmaǵy órtendi. Tilsiz jaý saǵat 22:20-da aýyzdyqtaldy.
Oblystyń Tótenshe jaǵdaılar departamentiniń málim etýinshe, qyzyl jalynnyń sharpýyna janyp ketken konteınerlerde saqtalǵan syǵylǵan plastmassa men makýlatýra sebep bolǵan.
Zardap shekkender joq. Órttiń mán-jaıy men sebepteri anyqtalyp jatyr.
