Temirtaýdaǵy oqıǵa: Barlyq balabaqshalarǵa beınebaqylaý kameralary ornatylady
ASTANA. QazAqparat - Bilim jáne ǵylym vıtse-mınıstri Ashat Aımaǵambetov Temirtaýdaǵy balabaqshada búldirshindi tunshyqtyrý oqıǵasyna qatysty pikir bildirdi, dep habarlaıdy QazAqparat.
«Barlyǵymyz bala tárbıelep jatyrmyz. Árıne, Temirtaýda bolǵan oqıǵa aqylǵa syımaıdy. Beınebaqylaý kameralaryn ornatý usynysy boıynsha tıisti qujattardy pysyqtap jatyrmyz. Osy oraıda barlyq balabaqshaǵa vıdeo kameralardy ornatý sharalaryn eskerip otyrmyz», - dedi vıtse-mınıstr Ortalyq kommýnıkatsııalar qyzmetindegi baspasóz máslıhatynda.
Budan buryn habarlanǵandaı, Temirtaýdaǵy jeke balabaqshanyń tárbıeshisi túski demalys ýaqytynda búldirshindi tunshyqtyrǵan.
Beınerolık 27 tamyz kúni áleýmettik jelilerde paıda boldy. Polıtsııa qyzmetkerleri áleýmettik jelilerde monıtorıng júrgizý barysynda «Shok_krg» paraqshasynan áıel adamnyń balanyń ústinen kórpemen basyp, erkinen tys ustap turǵany beınelengen vıdeony anyqtaǵan.
Polıtsııada málim etkendeı, vıdeony zertteý barysynda qalanyń balabaqshalarynyń birinde jumys isteıtin 50 jastaǵy tárbıeshiniń aty-jóni anyqtaldy. Onyń sózinen belgili bolǵandaı, kishkentaı qyz túski demalys ýaqytynda tárbıeshisiniń tilin almaı, tósekte sekire bergen. Oǵan shydamaǵan áıel adam balany kórpemen qysyp ustap turǵan.
