Temirtaýdaǵy kópqabatty úıde bolǵan órt kezinde múgedek áje men balalar qutqaryldy
QARAǴANDY. QazAqparat - Búgin túste Temirtaýda úsh bólmeli páter, sondaı-aq, bes balkon órtenip ketti, dep habarlaıdy «QazAqparat» HAA tilshisi.
Órt sóndirýshiler múgedek áje men 21 adamdy qutqardy. Qaraǵandy oblysy TJ departamenti baspasóz qyzmetiniń málimetinshe, órt saǵat 12:20-da 7-inshi shaǵynaýdandaǵy №43 úıde bolǵan.
«Toǵyz qabatty úıdiń besinshi qabatynda ornalasqan aýdany 60 sharshy metrdi quraıtyn úsh bólmeli páter tutastaı otqa orandy. Besinshi qabattyń balkonynan shyqqan órt altynshy, jetinshi, segizinshi jáne toǵyzynshy qabat balkondaryna ulasty. Osylaısha bes balkon da órtenip ketti», - dedi Qaraǵandy oblysy TJ departamenti baspasóz qyzmetiniń basshysy Qýanysh Mútalappov. Órt sóndirýshiler jarymjan áje men úsh balany qosqanda, 22 adamdy qutqaryp qaldy. Buǵan qosa, ózge kireberisterdegi 41 adam qaýipsiz aýmaqtarǵa kóshirildi. Órtenip ketken bes balkonnyń aýdany - 21 sharshy metr. Saǵat 13:23-te tilsiz órt tolyqtaı sóndirildi. Órtti aýyzdyqtaýǵa jeke quramnyń 28 adamy men 8 tehnıka jumyldyryldy.
