Temirtaýdaǵy eń tanymal kólik - tramvaı
QARAǴANDY. QazAqparat - Temirtaý turǵyndary qalada túrli avtobýs, taksılerdiń bolýyna qaramastan, ekologııalyq taza kólik - tramvaıǵa mingendi artyq sanaıdy. QazAqparat tilshisi qaladaǵy tramvaı parkiniń jumysymen tanysty.
Temirtaýdyń tramvaı júıesi 1959 jylǵy 5 qyrkúıekte ashyldy. Qazaqstanda tramvaı jelileri tek Temirtaý, Pavlodar jáne Óskemen qalalarynda ǵana qalǵan. Metallýrgter qalasynda tramvaı baǵdary buryn tórteý bolatyn, qazir sonyń tek bireýi paıdalanylady. Qaraǵandy metallýrgııa kombınaty 1993 jyly qala turǵyndarynyń ıgiligi úshin jeti jańa tramvaı satyp áperdi. Keıinnen qala ortalyǵynan eń shetkeri jatqan segizinshi shaǵyn aýdanǵa deıin rels jatqyzylyp, №3 jáne №4 tramvaı baǵdarlary paıda boldy. №1 jáne №3 baǵdarlar 2005 jyldyń aıaǵynda jabyldy. Qazir tramvaıda júrý quny - 50 teńge. 
Temirtaý tramvaı parki basshysynyń orynbasary Valerıı Sıvkonyń aıtýynsha, parkte 180 adam jumys isteıdi. Jumysshylardyń barlyǵy tájirıbeli mamandar. Máselen, ekinshi klassty júrgizýshi Larısa Trýhına 25 jyldan beri eńbek etip keledi.
«Men búkil ómirimdi osy salaǵa arnadym. Bastysy, ol maǵan unaıdy. Tramvaıdy júrgizý qıyn emes, degenmen ár jumystyń ózine tán qıyndyqtary bolady. Bizdiń jumysta erekshe saqtyq pen qyraǵylyq, jyldamdyqty qadaǵalap otyrý qajet. Temirtaýda tramvaı 05:00-den 23:30-ǵa deıin júredi. Ár brıgada - 12 adambyz. Negizinen áıelder. Bizdi kúnde jumysqa aparyp, úıge jetkizedi. Jelide 18 vagon bar, sonyń 12-si aýysymmen jumys isteıdi, altaýy qaýyrt shaqta júredi», - deıdi Larısa Trýhına.
Turǵyndar da qala úshin tramvaı óte qajet ekenin aıtady.
«Tramvaı qorshaǵan ortaǵa zalal keltirmeıdi, lastamaıdy. Onyń ústine tramvaı ortalyq kósheden ótedi, turǵyndar úshin tramvaıda júrgen óte yńǵaıly», - deıdi qala turǵyny Shyraıgúl Isabaeva.
Budan tys, tramvaı Temirtaý turǵyndarynyń ómirindegi ystyq estelikterdiń bir bóligi. Bitirýshiler, jańa shańyraq kótergender tramvaılardy jalǵa alyp, ishin árlep, dastarqan jaıyp, qalada qydyrǵandy sánge aınaldyrǵan.
