Temirtaýdaǵy banktiń tórt bólimshesin «jaryp jibermek» bolǵan adam izdestirilip jatyr
QARAǴANDY. QazAqparat - Polıtsııa «Kazkommertsbank» AQ tórt bólimshesine jarylǵysh zat qoıyldy dep qońyraý shalǵan adamdy izdestirip jatyr, dep habarlaıdy «QazAqparat» HAA tilshisi.
26 jeltoqsan kúni jedel basqarmanyń kezekshi bólimine 14 saǵat 26 mınýtta qońyraý túsip, banktiń tórt bólimshesinen de adamdardy evakývtsııalaý týraly sheshim qabyldandy. Qońyraý shalǵan adam «jaryp jibermek» bolǵan ǵımarattardyń mekenjaıyn da aıtpaǵan.
Altynshy shaǵynaýdandaǵy bólimsheden 45 adam, Respýblıka dańǵyly boıynsha - 140 adam, Metallýrgter dańǵylynda - 83 adam, Beıbitshilik kóshesinde 60 adam evakýatsııalandy.
Shuǵyl jetken kınologtar men saperler bir ýaqytta atalǵan tórt mekenjaıǵa baryp, banktiń tórt fılıalyn tekserdi. Kúdikti zat tabylǵan joq.
«Qońyraý shalǵan jannyń telefon nómiri anyqtaldy. Onyń kim ekendigin anyqtaý jáne ustaý» sharalary júrgizilip jatyr»,- dep habarlady Qaraǵandy oblysy ishki ister departamentiniń baspasóz qyzmeti.
