Temirtaýdaǵy áıgili Qysqy baq jańartyldy
QARAǴANDY. QazAqparat - Temirtaýda qysqy baqqa kúrdeli jóndeý júrgizildi. Oranjereıaǵa burynnan ózgeris qajet bolatyn. Jóndeý jumystayna qarajat «Jumyspen qamtýdyń jol kartasy» baǵdarlamasy boıynsha bólindi, dep habarlaıdy QazAqparat tilshisi.
«Aýqymdy jumys atqaryldy. Ǵımarattyń terezeleri aýystyrylyp, shatyry jóndeldi. Sýarý júıesin jańartyldy. Buǵan deıin bizge ósimdikterdi qolmen búrkýge týra keletin. Endi jumystyń barlyǵy anaǵurlym jeńildedi. Klımat-baqylaý júıesi paıda boldy, kondıtsıonerler ornatyldy», - dedi agronom Botagóz Táshenova.
Mamannyń aıtýynsha, ósimdikter jóndeý kezeńinnen jaqsy ótti. Topyraq qyrtysyn aýystyrý olarǵa jaqty. Qazir jańartylǵan baqta qytaı raýshandary, oleandr belsendi gúldeýde.
Temirtaýda qysqy baq 1993 jyly 16 qańtarda ashyldy. Jylyjaıdyń aýdany - 2 myń sharshy metrden asady. Onyń jobalyq oryndalýy kúrdeli etip josparlanǵan. Arka túrindegi bıik ǵımarat shyǵys stılinde salynǵan, tómengi jaǵynda vıtrajdarmen jabylǵan.
Qysqy baqta otany tropıkalyq, sýbtropıkalyq jáne álemniń shóldi aımaqtarynda ósetin kóptegen erekshe ósimdiktiń 120-dan astam túri jınalǵan.
