Temirtaýdaǵy apattyq jańa úıdiń máselesine núkte qoıyldy
QARAǴANDY. QazAqparat - Merdigerdiń esebinen Temirtaý qalasynyń 9-shy shaǵyn aýdanyndaǵy problemalyq kópqabatty úı buzylatyn bolady. «Nurly jer» baǵdarlamasy boıynsha salynyp jatqan úıdiń qurylysyn qabyrǵalardyń jarylýyna baılanysty toqtatýǵa týra keldi, dep habarlaıdy QazAqparat tilshisi.
«Merdiger qurylysty óz esebinen bólshekteıdi. Sodan keıin jańa qurylys bastalady. Qarastyrylǵan bıýdjet sheńberinde qaıtadan salamyz. Másele mamyr aıynda anyqtaldy. Eger qala basshylyǵy birden basyndaǵy jaǵdaıdy sheshýge kiriskende, kezekte turǵandardyń úmitin aqtar edi. Endi 50 otbasy bıylǵy jyly ýáde etilgen páterlerge kire almaı qaldy», - dep oblys ákimi Jeńis Qasymbek Temirtaýdyń damý áleýeti jónindegi keńeste sheshim qabyldady.
Jıynda turǵyn úı máselesin sheshý joldary talqylandy.
Qala ákimi Ǵalym Áshimovtyń aqparaty boıynsha, 2700 temirtaýlyq otbasy páter kezeginde tur. Alǵa qoıylyp otyrǵan mindet – 2025 jylǵa qaraı kórsetkishti bir jarym esege arttyryp, 30 sharshy metrge deıin jetkizý bolyp otyr.
Kelesi jyly kezekte turǵandar úshin 4 «A» oramyndaǵy 90 páterlik eki úıdi tapsyrý qajet. Sonymen qatar, jeke turǵyn úı qurylysyn damytýǵa múmkindik bar. Ol úshin 500-ge jýyq bos jer ýchaskeleri bar, al bıýdjet esebinen ınjenerlik ınfraqurylym júrgiziletin bolady, dep habarlady qala ákimi.
«Turǵyndar sany halyqtyń ýrbanızatsııa esebinen ósýde. Kóshi-qon saldosy oń. Kezekte turǵandar az bolmaıdy. Qoljetimdi turǵyn úı qurylysyn birneshe ese ulǵaıtý qajet», - dep atap ótti Jeńis Qasymbek.
Oblys ákimi, sondaı-aq, aıaqtalmaǵan kommertsııalyq nysandardy anyqtaýdy tapsyrdy. Ol 9 jyl buryn salynǵan saýda ortalyǵyn mysalǵa keltirdi.
