Temirtaýda zııandy shyǵaryndylardy tómendetý týraly memorandýmǵa qol qoıyldy
QARAǴANDY. QazAqapart - Parlament Májilisi depýtattarynyń bir toby Temirtaý qalasynda boldy. Olarmen birge QR ekologııa, geologııa jáne tabıǵı resýrstar mınıstri Maǵzum Myrzaǵalıev te keldi, dep habarlaıdy QazAqparat tilshisi.
QR Parlamenti Májilisiniń Ekologııa jáne tabıǵatty paıdalaný komıtetiniń kóshpeli otyrysynda iri kásiporyndardyń tehnogendik áserin tómendetý, óndiristi jańǵyrtý sekildi ózekti máseleler qaraldy.
«Biz Temirtaýǵa kezdeısoq kelgen joqpyz. Munda iri ónerkásiptik kásiporyndardyń biri – «ArselorMıttal Temirtaý» jumys isteıdi. Kompanııa qala quraýshy kásiporyn ǵana emes, sonymen qatar qorshaǵan ortany lastaýdyń negizgi kózi bolyp tabylady. Bizdiń komıtet beıindi mınıstrlikpen birlesip osy jerde lastaýshy kásiporyndardyń zamanaýı tehnologııalarǵa kóshý máselelerin talqylaýdy sheshti», - dedi komıtet tóraǵasy Gleb Şegelskıı.
Qazaqstannyń Tuńǵysh Prezıdenti – Elbasy Nursultan Nazarbaev pen Memleket basshysy Qasym-Jomart Toqaev ónerkásipke ekologııalyq taza tehnologııalardy engizý boıynsha mindetter qoıdy, dep atap ótti kezdesýge qatysýshylar.
Ótken jyly Qaraǵandy oblysyna jumys sapary barysynda Elbasy óńirdegi ekologııalyq jaǵdaıdy jaqsartýdy tapsyrǵan bolatyn. Oblys ákimdigi tıisti keshendi jospardy bekitti. Óńirde qorshaǵan ortany qorǵaý jónindegi Keńes quryldy. Bılik ókilderi Qazaqstannyń ekologııalyq uıymdary qaýymdastyǵymen Yntymaqtastyq týraly memorandýmǵa qol qoıdy.
Otyrysta oblys ákiminiń orynbasary Serik Shaıdarov Keshendi jospardyń oryndalýy týraly baıandady. Onyń aıtýynsha, 2023 jylǵa deıin qorshaǵan ortany saýyqtyrý sharalaryn júzege asyrý úshin barlyq kózderden 121 mlrd teńgeden astam qarjy salý josparlanyp otyr.
Sonymen qatar, ekologııa, geologııa jáne tabıǵatty paıdalaný mınıstrliginiń aqparaty boıynsha, «ArselorMıttal Temirtaýǵa» oblys boıynsha zııandy qaldyqtardyń tórtten bir bóligi jáne 80%-dan astamy Temirtaýǵa keledi.
«Kompanııa sońǵy alty jylda jalpy somasy 11 mlrd teńgege tabıǵat qorǵaý sharalaryn júzege asyrdy. Bylaı qarap otyrsaq, bul soma úlken jáne nátıje bolýy tıis. Alaıda lastaýshy zattardyń shyǵaryndylary tek 13,5 myń tonna shańǵa qysqardy, bul shyǵaryndylardyń jalpy kóleminiń 6,5%-yn ǵana quraıdy. Osyǵan baılanysty atmosferaǵa lastaýshy zattardyń shyǵarylýyn qysqartý boıynsha tujyrymdamalyq tehnıkalyq sheshimderdi qaıta qaraý qajettigi týyndady», - dedi mınıstr.
Maǵzum Myrzaǵalıevtyń aıtýynsha, mınıstrlik pen «ArselorMıttal Temirtaý» 2023 jylǵa deıin emıssııa kólemin bes jyl ishinde 30%-ǵa tómendetý týraly kelisti. Otyrysta eki jaqty yntymaqtastyq týraly Memorandýmǵa qol qoıyldy.
«30% kólem jaıdan jaı alynǵan joq. Júrgizilgen naqty esepteýler. Biz eki aı boıy memorandýmdy qol qoıýǵa daıyndadyq. Jáne de biz onyń oryndalýyn qatań qadaǵalap, baqylaıtyn bolamyz. 30% - bul shekti san emes. Osynyń barlyǵy betinde jatqan máseleler. Áli de tómendeý rezervteri bar», - dep túsindirdi mınıstr.
Ol memorandým boıynsha kompanııa qalada 500 myń aǵash otyrǵyzýǵa mindettenetinin aıtty.
Májilis depýtattary sondaı-aq «ArselorMıttal Temirtaýǵa» baryp, óndiris jumysymen tanysty. Kóshpeli otyrys nátıjeleri boıynsha Komıtet músheleri ekologııalyq jaǵdaıdy jaqsartýǵa baılanysty óz usynymdarynyń toptamasyn daıyndaıdy.
