Temirtaýda jol apatynan eki adam qaza tapty
TEMІRTAÝ. QazAqparat – Búgin Temirtaý mańynda eki júk kóligi soqtyǵysty. Oqıǵa saldarynan eki er adam qaza taýyp, bir bala aýrýhanaǵa jetkizildi, dep habarlaıdy QazAqparat tilshisi.
Qaıǵyly oqıǵa búgin kúndiz Temirtaý-Qyzylqoı tas jolynda boldy.
Aldyn ala málimetter boıynsha, júk tasyǵysh kólik qarsy jolaqqa shyǵyp, Gaz-53 kóligimen soqtyǵysqan. Sońǵysynyń jolaýshysy men júrgizýshisi oqıǵa ornynda qaıtys boldy.
«1 tamyz kúni saǵat 12:50 shamasynda Buqar Jyraý aýdanynda «Temirtaý q.-Qyzylqoı k.» avtojolynda aldyn ala derekter boıynsha SHACMAN júk kóliginiń 33 jastaǵy júrgizýshisi rýldi basqara almaı, qarsy qozǵalys jolaǵyna shyǵyp, 38 jastaǵy er adamnyń basqarýyndaǵy GAZ-53 júk avtomobılimen betpe-bet soqtyǵysqan. Jol-kólik oqıǵasy saldarynan GAZ-53 júrgizýshisi men onymen birge kabınada bolǵan 21 jastaǵy er adam oqıǵa ornynda kóz jumdy. Sondaı-aq, atalǵan kóliktiń jas jolaýshysy túrli jaraqattarmen Temirtaýdaǵy medıtsınalyq mekemelerdiń birine jatqyzyldy», - dep habarlady Qaraǵandy oblysy PD baspasóz qyzmeti.
Atalǵan fakti boıynsha QR QK 345-baby 4-bóligi boıynsha sotqa deıingi tergeý bastaldy. Tıisti saraptamalar taǵaıyndaldy.
