Temirtaýda jol apatynan 6 jasar bala men er adam qaza tapty
TEMІRTAÝ. QazAqparat – Temirtaý qalasynda kóktaıǵaq saldarynan eki jeńil kólik soqtyǵysyp qaldy. Jol apaty saldarynan 6 jasar bala men 66 jastaǵy er adam qaza taýyp, taǵy tórteýi aýrýhanaǵa jetkizildi, dep habarlaıdy QazAqparat tilshisi.
11 jeltoqsanda Temirtaý qalasynda «Ford» avtokóliginiń 28 jastaǵy júrgizýshisi Vostochnaıa kóshesimen Respýblıka dańǵyly baǵytynda kele jatyp, «Kıa» avtokóligimen soqtyǵysqan. Aldyn ala málimetter boıynsha, apat kóktaıǵaqqa saldarynan bolǵan. Tańǵaq jol ústinde «Ford» júrgizýshisi rýldi basqara almaı, qarsy qozǵalys jolaǵyna shyǵyp ketken.
«Jol apaty saldarynan 66 jastaǵy «Kıa» avtokóliginiń júrgizýshisi men onyń jolaýshysy alǵan jaraqatynan kóz jumdy. «Ford» avtokóliginiń júrgizýshisi men «Kıa» avtokóliginiń úsh jolaýshysy túrli jaraqatpen medıtsınalyq mekemege jetkizildi», - dep habarlady Qaraǵandy oblysy PD baspasóz qyzmeti.
«Temirtaý qalasynyń Ortalyq aýrýhanasyna JKO-dan 5 zardap shegýshi kelip tústi. 11 jeltoqsanda 2014 jyly týǵan qyz alǵan jaraqattardan qaıtys boldy. Sol kúni 1954 jyly týǵan er adam da kóz jumdy. Qazirgi ýaqytta 1959 jyly týylǵan jáne 1986 jyly týylǵan 2 zardap shekken adam Temirtaý qalasynyń ortalyq aýrýhanasynyń jansaqtaý bóliminde jatyr. Taǵy bir zardap shekken - 2010 jyly týǵan er bala Maqajanov atyndaǵy kópsalaly aýrýhanada em alyp jatyr. Jaǵdaıy turaqty aýyr», - dep túsindirdi Qaraǵandy oblysy Densaýlyq saqtaý basqarmasynyń baspasóz qyzmeti.
Atalǵan fakti boıynsha QR QK 345-baby 3-bóligine saı qylmystyq is tirkeldi. Tıisti saraptamalar taǵaıyndaldy, tergeý júrgizilýde.
