Temirtaýda joǵalyp ketken er adamnyń órtelgen múrdesi tabyldy
QARAǴANDY. QazAqparat - Qaraǵandy oblysynyń Temirtaý qalasynda eki aıǵa jýyq iz-tússiz ketken 42 jastaǵy Sergeı Afonınniń múrdesi tabyldy, dep habarlaıdy «QazAqparat» HAA tilshisi.
Er adamnyń órtelgen múrdesi qaladan alysta daladan tabyldy.
«Atalǵan oqıǵa boıynsha is sotqa deıingi tergeýdiń biryńǵaı tizilimine QR QK-niń 106 babynyń 3 bóligi boıynsha (Adamdy urlaýmen ushtasqan, densaýlyqqa qasaqana aýyr zııan keltirý saldarynan bolǵan kisi ólimi) tirkeldi. Qajetti saraptamalar taǵaıyndaldy. Tergeý jalǵasýda», - dedi oblystyq ІІD baspasóz qyzmetiniń jetekshisi Baqytjan Qudııarov.
Onyń aıtýynsha, ólimniń sebebin anyqtaý úshin qosymsha keshendi saraptama taǵaıyndalǵan.
Sonymen qatar marqumnyń týystary onyń máıitin jerleýge uzaq ýaqyt berilmeı júrgenin aıtyp shaǵymdanýda. Múrde 10 qyrkúıekte tabylǵanymen, sozylyp ketken sot-medıtsınalyq saraptama kesirinen ol týystaryna berilmegen.
42 jastaǵay S.Afonın Temirtaýda 22 shildede joǵalyp ketken. Іzdestirý kezinde onyń úıden shyǵyp taksıge otyrǵannan keıin eshkimniń kórmegeni aıtylǵan.
