Temirtaýda jerlengen adamnyń qabirin qazǵany úshin 20 jastaǵy jigit ustaldy
QARAǴANDY. QazAqparat - Qaraǵandy oblysy Temirtaý qalasynda jerlengen adamnyń qabirin qazǵany úshin turǵylyqty jeri joq 20 jastaǵy jigit ustaldy, dep habarlady oblystyq ІІD baspasóz qyzmeti.
«22 shildede Temirtaý ІІB polıtsııa bólimine 42 jastaǵy jergilikti turǵyn shaǵymdanǵan. Áıel polıtseılerge ápkesin jerlegennen 10 kún ótken soń zıratqa barsa, onyń molasyn bireý qazyp ketkenin aıtqan», - delingen habarlamada.
Tártip saqshylary kúdiktini qolǵa túsirdi. «Ol turaqty meken jaıy joq 20 jastaǵy jigit bolyp shyqty. Ol zıratta mekendegen. Ustalǵan jigit zırat qyzmetkerlerimen ursysqan soń, olardy jazalamaq bolyp mundaı áreketke barǵanyn aıtty», - delingen habarlamada.
Atalǵan fakt boıynsha QR QK 314 babyna sáıkes sot aldyndaǵy tergeý jumystary júrgizilip jatyr.
