Temirtaýda jasandy sý qoımasyna 14 jastaǵy bala batyp ketti
TEMІRTAÝ. QazAqparat – Temirtaý qalasy mańyndaǵy jasandy sý qoımalarynyń birine 14 jastaǵy bala batyp ketti. Qutqarýshylar shaqyrylǵannan keıin bir saǵat ótken soń er balanyń denesi sýdan shyǵaryldy, dep habarlaıdy QazAqparat tilshisi.
Qaıǵyly oqıǵa Temirtaý qalasynyń Aqtaý kentinde bolǵan. Aldyn ala málimet boıynsha, jasóspirim dosymen birge shomylýǵa tyıym salynǵan jasandy sý qoımasyna túsken.
«29 maýsym kúni keshke Temirtaý qalasynyń jasandy sý qoımasynda súńgýirler balanyń denesin alyp shyqty. Saǵat 19:02-de habarlama kelip tústi, saǵat 20:07-de balanyń denesi tabylyp, sýdan shyǵaryldy», - dep habarlady Qaraǵandy oblysy TJD baspasóz qyzmetinen.
Qutqarýshylar arnaıy jabdyqtalǵan oryndarda ǵana shomylýǵa bolatynyn eskertedi. Ásirese, sý mańynda balalar men jasóspirimderge erekshe nazar aýdarý kerek.
Qaraǵandy oblysynyń TJD balany sýdaǵy jazataıym oqıǵalardan qalaı saqtaý kerektigin eske saldy:
- balalardy shomylýǵa qaraýsyz jibermeńiz.
- shomylýǵa tyıym salynǵan jerlerge sýǵa túsip, teris ádet qalyptastyrmańyz, jaman úlgi kórsetpeńiz.
- eger balanyń janynda bolmasańyz, balalar qońyraý shala alatyn shuǵyl qutqarý qyzmetteriniń telefondaryn jattap alýyn qadaǵalańyz.
- ata-analar árqashan balanyń qaıda ekenin, kimmen jáne qashan úıge oralýdy josparlaǵanyn bilýi kerek.
