Temirtaýda jańa emhana ashylady
NUR-SULTAN. QazAqparat - Temirtaý qalasynda jańa medıtsınalyq nysan paıda boldy. Elbasynyń tapsyrmasy boıynsha «ArselorMıttal Temirtaý» AQ emhana saldy. Alǵashqy patsıentterdi mekeme mamyr aıynda qabyldaýǵa daıyn. Qaraǵandy oblysynyń ákimi Jeńis Qasymbek medıkter qandaı jaǵdaıda jumys istep, temirtaýlyqtardy emdeıtinin bilip qaıtty, dep habarlaıdy oblystyq ákimdiktiń baspasóz qyzmeti.
«Emhanany qoldanysqa berý ǵana qaldy. Medıtsınalyq jabdyqtar ornatyldy. Qazir jıhaz jetkiziledi», - dedi AMT atqarýshy dırektory Vadım Basın.
Jańa emhana turǵyn úı massıvinde ornalasqan. Buǵan deıin adamdar dárigerlerdiń qabyldaýyna barý úshin birneshe shaqyrym júrýge májbúr bolatyn. Mekemege 20 myń adamǵa deıin tirkele alady.
Emhananyń janynan taǵy bir nysan – dene shynyqtyrý-saýyqtyrý kesheni salynyp jatyr. Ǵımarat syrty daıyn, ishki jumystar aıaqtalýǵa jaqyn.
Jeńis Qasymbekti jańa ǵımarattardyń janyndaǵy aýmaqty abattandyrý máselesi qyzyqtyrdy.
«Asfalttańyzdar. Jaıaý júrginshiler jolyn jasańyzdar, turaq jabdyqtaý máselesin oılastyryńyzdar. Aınalasyn da qarańyzdar, adamdardyń júrýi yńǵaıly bolýy úshin jaǵdaı jasańyzdar», - dedi ol.
Oblys ákimine joba boıynsha eki nysannyń da aýmaǵyn abattandyrý qarastyrylǵanyn jáne jumystar maýsym aıynda aıaqtalýy tıis ekenin aıtyp sendirdi.
