Temirtaýda sýǵa ketken oqýshy qyz izdestirilip jatyr
QARAǴANDY. QazAqparat - Temirtaý qalasyndaǵy TJ basqarmasy súńgýirleri eki táýlik boıy Nura ózeninen 14 jastaǵy qyzdy izdestirip jatyr, dep habarlaıdy «QazAqparat» HAA tilshisi.
Qyzdy ózen aǵyny alyp ketken dep boljanyp otyr.
Qaıǵyly oqıǵa 29 mamyr kúni keshke bolǵan, alaıda osy ýaqytqa deıin qyzdyń denesi tabylǵan joq.
«Bul jerdegi sýdyń aǵyny qatty. Kúsheıgen jel izdestirý jumystaryn qıyndatyp tur», - deıdi TJ basqarmasynyń aǵa qutqarýshysy Ilıa Papılov.
Balalardyń aǵashqa baılanǵan arqanda terbetilip, ózenge sekirip oınaǵandyǵy anyqtaldy.
«Qazir aýa raıy qolaısyz bolyp tur - jel, sol sebepti sý da tunyq emes. Joǵalǵan balany tabýǵa barlyq kúsh jumsalyp jatyr»,- deıdi sýdan qutqarý stantsııasynyń basshysy Mıhaıl Shýlenın.
