Temirtaýda shaǵyn fýtboldan uıymdastyrylǵan týrnırdiń sońy tóbeleske ulasty
TEMІRTAÝ. QazAqparat – Temirtaýda shaǵyn fýtboldan týrnır sońynda komanda oıynshylary jaǵa ustasyp qaldy. Tártip saqshylary qaqtyǵystyń barlyq qatysýshylaryn anyqtady. Kinálilerge 5000 AEK kóleminde aıyppul salynady nemese 5 jylǵa deıin bas bostandyǵynan aıyrý jazasy berilýi múmkin, dep habarlaıdy QazAqparat tilshisi.
Qaraǵandylyq tártip saqshylar áleýmettik jelilerge monıtorıng júrgizý barysynda Telegram kanaldardyń birinen shaǵyn fýtboldan jarysqa qatysqan eki komandanyń oıynshylary arasynda janjal týyndaǵany týraly beınerolık anyqtaldy.
Bul derekti Temirtaý qalasynyń polıtsııasy tirkedi. Sotqa deıingi tergeý júrgizý kezinde tártip saqshylary tóbeleske qatysýshylardyń barlyǵyn anyqtady.
«21 naýryzda Temirtaý qalasynyń sport keshenderiniń birinde áýesqoı komandalar arasynda shaǵyn fýtboldan týrnır uıymdastyrylǵany anyqtaldy. Eki komandanyń oıyny kezinde sportshylardyń biri erejeni buzyp, qarsylastar tobynyń ókili oıynshyny ıterip jiberdi. Muny kórgen soń, janjalǵa onyń komandasynyń músheleri qosylyp, janjaldyń arty tóbeleske ulasty», - dep habarlady Qaraǵandy oblysy PD baspasóz qyzmeti.
Atalǵan fakti boıynsha QR QK 293-baby 2-bóligi «Bir top adam jasaǵan buzaqylyq» boıynsha qylmystyq is tirkeldi. Osy bapqa sáıkes bes myń aılyq eseptik kórsetkishke deıingi mólsherde aıyppul salý, ne sol mólsherde túzeý jumystary, nemese bir myń eki júz saǵatqa deıingi merzimge qoǵamdyq jumystarǵa tartý, ne bolmasa bes jylǵa deıingi merzimge bas bostandyǵyn shekteý, álde sol merzimge bas bostandyǵynan aıyrý túrindegi jaza kózdelgen.
Tóbeleske qatysýshylardyń barlyǵyna qatysty sot-medıtsınalyq saraptama taǵaıyndaý týraly qaýly shyǵaryldy. Tergeý amaldary júrgizilýde.