Temirtaýda salyq qyzmetkerleri kásipkerlerden para bopsalaǵany áshkerelendi

Bul týraly búgin elordada QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti.

Resmı ókildiń aıtýynsha, Qaraǵandy oblysy Temirtaý qalalyq salyq basqarmasynyń laýazymdy tulǵalarynyń salyqtyq tekserister boıynsha oń aktiler shyǵarý úshin kásipkerlerden júıeli túrde para bopsalaǵandyǵy anyqtaldy.

«Jedel-izdestirý sharalary nátıjesinde osy salyq basqarmasynyń bólim bastyǵy Esenbaev pen bas mamany Manashov kásipkerden «Vostok-107» JShS-in taratý boıynsha salyqtyq tekseristi tezdetý úshin 7 myń AQSh dollaryn jáne «K-PROJECT» JShS-in tekserý kezinde zań buzýshylyqtardy aıqyndamaý úshin 20 myń AQSh dollaryn talap etkendigi belgili boldy», - dedi ol.

M.Jumanbaıdyń sózine qaraǵanda, olar parany valıýta aıyrbastaý pýnkti arqyly alýdyń tásilin oılap tapqan. «Aǵymdaǵy jylǵy 5 naýryzda Manashovtyń 7 myń AQSh dollary kóleminde jáne 29 naýryzda 20 myń AQSh dollary kóleminde para alý faktileri taspaǵa túsirilip alyndy. Qylmystyq is tergelýde. Manashov sot sanktsııasymen qamaýǵa alyndy», - dedi resmı ókil.