Temirtaýda respýblıkalyq Prezıdenttik olımpıada ótti
ASTANA. QazAqparat - Temirtaýda QR Bilim jáne ǵylym mınıstrliginiń uıymdastyrýymen jaratylystaný-matematıka pánderi boıynsha HІ Prezıdenttik olımpıada ótti, dep habarlaıdy Qaraǵandy oblysy ákimdiginiń baspasóz qyzmeti.
Olımpıadaǵa Respýblıkanyń barlyq oblystarynan on birinshi synyp oqýshylary qatysty. Olardyń jumystaryn halyqaralyq jáne Prezıdenttik Olımpıadalardyń jeńimpazdary men júldegerleri, jetekshi otandyq jáne sheteldik joǵarǵy oqý oryndarynyń PhD doktorlary baǵalady. Ál-Farabı atyndaǵy QazUÝ, L. Gýmılev atyndaǵy EUÝ, M. Lomonosov atyndaǵy MMÝ ǵalymdary qazylar alqasynyń qurmetti músheleri boldy.
Olımpıadanyń jabylý saltanaty juma, 16 qarasha kúni Qaraǵandy memlekettik ındýstrııalyq ýnıversıtetiniń qabyrǵasynda ótti. Jeńimpazdar men júldegerlerge syılyqtar tabystaldy.
Tórt qaraǵandylyq olımpıadanyń qola júldegerleri atandy: Altyn Amanboldy (Balqash q. №2 mektep-lıtseıi), Álıhan Májiken («Daryn» oblystyq mamandandyrylǵan mektep-ınternaty), Karına Beısova (Qaraǵandy q. №2 lıtseıi) jáne Dinmuhamed Baıjomart (Jezqazǵan q. «Bilim-Innovatsııa» lıtseı-ınternaty).
QR BǴM-niń І, ІІ jáne ІІІ dárejeli dıplomdarymen marapattalǵan Prezıdenttik olımpıadanyń jeńimpazdary men júldegerlerine respýblıkamyzdyń joǵarǵy oqý oryndaryna oqýǵa túsý kezinde bilim granttaryn alýda basymdyqtar beriledi.
