Temirtaýda PTR zerthana iske qosyldy
QARAǴANDY. QazAqparat - Temirtaýda táýligine 1 500 test jasaıtyn PTR zerthana ashyldy. Ol memlekettik-jekeshelik seriktestik baǵdarlamasy boıynsha jumys isteıdi, dep habarlaıdy QazAqparat tilshisi.
Zerthana Temirtaý juqpaly aýrýlar aýrýhanasynyń ǵımaratynda ornalasqan. Ol Reseı, Germanııa, AQSh jáne Qytaı óndirisiniń barlyq qajetti zamanaýı jabdyqtarymen jabdyqtalǵan.
Munda qalanyń statsıonarlary men emhanalarynda alynǵan testiler jiberiletin bolady. Zerthanany «Olımp» KDZ men «ArselorMıttal Temirtaý» AQ birlesip qarjylandyrdy. Temirtaý ákimdigi men Qaraǵandy oblysynyń Densaýlyq saqtaý basqarmasy jobany qoldap, oǵan ǵımarat usyndy.
«PTR zerthanasynyń ashylýy - qazirgi qıyn kezde óte mańyzdy. Memleket basshysynyń tapsyrmasyna sáıkes azamattarymyzdyń barynsha kóp sanyn testileýmen qamtýǵa tyrysamyz. Qyrkúıek aıynda bizdiń oblysta barlyq iri eldi mekenderdi qamtıtyn zerthanalar jelisi qurylatyn bolady», - deıdi Densaýlyq saqtaý basqarmasynyń basshysy Erjan Nurlybaev.
Osy jyldyń naýryz aıynan beri bul Qaraǵandy oblysyna ashylǵan tórtinshi PTR zerthana. Kelesi nysandy qyrkúıek aıynda Balqashta iske qosý josparlanýda.
