Temirtaýda Prezıdent olımpıadasy ótip jatyr
QARAǴANDY. QazAqparat - Temirtaýdaǵy Qaraǵandy memlekettik ındýstrıalyq ýnıversıtetinde (QMIÝ) jaratylystaný-matematıkalyq pánder boıynsha H Prezıdent olımpıadasy ótip jatyr, dep habarlaıdy óńir basshysynyń resmı saıty .
Dástúr boıynsha ıntellektýaldy kópsaıys Qazaqstan Respýblıkasynyń Tuńǵysh Prezıdenti kúni qarsańynda ótedi.
- Temirtaý - Prezıdentimiz Nursultan Nazarbaevtyń eńbek joly men saıası mansaby bastalǵan qala, al QMIÝ - Elbasy joǵary bilim alǵan oqý orny. Sondyqtan biz balalardyń muny kórip-bilgenin qalaımyz,-deıdi QR BǴM «Daryn» respýblıkalyq ǵylymı-tájirıbelik ortalyǵynyń dırektory Sholpan Qırabaeva. - Olımpıadanyń árbir qatysýshysy óz aımaǵyn - onyń salt-dástúri men kıeli jerlerin tanystyrady".
Prezıdent olımpıadasyna elimizdiń ár túkpirinen úzdik 11-synyp oqýshylary , barlyǵy 160 adam jınaldy. Olımpıada eki kezeńnen turady: teorııalyq jáne praktıkalyq. Qatysýshylar tórt pán boıynsha esepterdi shyǵarady: matematıka, fızıka, hımııa jáne bıologııa.
Ádilqazylar alqasyn akademık Muhtarbaı Ótelbaev basqarady. Onyń quramyna elimizdegi aldyńǵy qatarly JOO ókilderi endi. Olımpıada nátıjeleri 10 qarasha kúni belgili bolady. Jeńimpazdar men júldegerlerge respýblıkamyzdyń joǵary oqý oryndaryna túsý kezinde bilim granttaryn bólgende basymdyqtar beriledi.
