Temirtaýda polıtsııa qyzmetkeri jaıaý júrginshini qaǵyp óltirdi
QARAǴANDY. QazAqparat – Temirtaýda qyzmettik avtokóliktiń júrgizýshisi polıtseı tumannan joldy kórmeı, jaıaý júrginshini qaǵyp ketip mert qyldy, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
3 qazan kúni Temirtaýda «Lada vesta» qyzmettik avtokóliktiń júrgizýshisi polıtseı Respýblıka dańǵylymen Vostochnaıa kóshesine qaraı kele jatyp, tuman saldarynan joldyń nashar kórinýine baılanysty rettelmegen jaıaý júrginshiler jolynda 65 jastaǵy er adamdy qaǵyp ketti. Ol Temirtaý qalasynyń aýrýhanasynda qaıtys boldy.
Oqıǵa ornyna Qaraǵandy oblysy Polıtsııa departamentiniń basshylyǵy, oblystyq PD JQB jeke quram boıynsha ınspektsııasy, Temirtaý qalasy prokýratýrasynyń ókilderi bardy. Olardyń qatysýymen polıtsııa serjanty narkologııalyq dıspanserde tekserýden ótti. Saraptama nátıjesi júrgizýshiniń saý bolǵanyn kórsetti.
«Atalǵan fakti boıynsha QR QK 345-baby 3-tarmaǵy negizinde sotqa deıingi tergeý bastaldy. Qylmystyq isti oblystyq PD Anyqtaý basqarmasy júrgizýde. Tergeýdiń shynaıylyǵy men jan-jaqty bolýyna kúmán joq. Іs oblystyń PD basshysynyń baqylaýynda», - Qaraǵandy oblystyq PD baspasóz qyzmeti.
