Temirtaýda polıtseıler kópqabatty úıdiń shatyryna shyǵyp ketken jigitti qutqardy
TEMІRTAÝ. QazAqparat – Qaraǵandy oblysynyń Aqtaý kentindegi tártip saqshylary bes qabatty úıdiń shatyryna shyǵyp ketken 26 jastaǵy jigitti qutqardy. Polıtsııany oqıǵa ornyna kýágerler shaqyrǵan, dep habarlaıdy QazAqparat tilshisi.
16 aqpan saǵat 18.20-da Temirtaý qalalyq polıtsııa basqarmasynyń kezekshi bólimine Aqtaý kentiniń 60 jastaǵy turǵyny habarlasyp, bes qabatty úıdiń shatyrynda belgisiz er adam aıǵaılap, arly-berli júrgenin aıtqan.
Oqıǵa ornyna dereý 414 avtopatrýli jiberildi. Onyń quramynda Temirtaý qalasy PD patrýldik polıtsııa batalonynyń ınspektorlary Áljan Sádýaqasov pen Baýyrjan Aıqynbaev bar edi.
«Polıtseıler úıdiń tóbesine kóteriledi. Sol sátte Áljan Sádýaqasov bildirtpeı er adamǵa jaqyndaǵan. Ol oraıla sátte er adamdy kúrteshesiniń jaǵasynan ustap, qaýipsiz jerge alyp ketti», - dep habarlaıdy Polisia.kz aqparattyq medıa-portaly.
Keıin er adam ózine qol jumsaý oıynda bolmaǵanyn moıyndady. Ol osy áreketimen burynǵy áıeliniń nazaryn ózine aýdartqysy kelgen.
