Temirtaýda polıtseıler 10 mln teńgeniń buıymyn urlaǵan kúdiktilerdi ustady
QARAǴANDY. QazAqparat –Temirtaý qalasynyń eki turǵyny kópqabatty úılerdiń birinde ornalasqan páterdiń terezesinen kirip, jalpy quny 10 mln teńge turatyn zergerlik buıymdardy urlap ketken, dep habarlaıdy QazAqparat tilshisi.
26 qańtar kúni Temirtaý qalasy ІІB-niń Stargorod polıtsııa bóliminiń kezekshi bólimine 46 jastaǵy qala turǵyny beıtanys tulǵalar plastık terezesin ashyp, páterinen altyn zergerlik buıymdar men «Canon» fotoapparatyn urlap ketkendigi týraly aryzdanǵan. Jalpy shyǵyn 10 285 000 teńgeni qurady.
Atalǵan jaıtqa baılanysty QR QK-niń 188-baby 4-bóligi «asa iri mólsherde bóten múlikti urlaý» boıynsha qylmystyq is qozǵaldy.
«Qalalyq polıtsııa basqarmasynyń basshylyǵy kúdiktini anyqtaý jáne ustaý úshin barlyq jeke quramdy baǵyttady. Qylmys ornynan izder alyndy. Qyzmettik ıtter tartyldy. Jaqyn ornalasqan úılerdiń beıne baqylaý kameralary zertteldi. Polıtsııa departamentiniń tájirıbeli qyzmetkerleri jumyldyrylǵan. Jedel-izdestirý is-sharasy barysynda polıtsııa qyzmetkerleri kúdiktilerdi anyqtap, ustady. Olar 21-27 jastaǵy qala turǵyndary bolyp shyqty. Aıǵaqty zattar jartylaı tárkilendi», - dep habarlady Qaraǵandy oblysy PD baspasóz qyzmeti.
Ustalǵandar ýaqytsha ustaý ızolıatoryna qamaldy. Qazirgi ýaqytta tergeý amaldary júrgizilýde.
