Temirtaýda patsıent retinde emhanany teksergen bas sanıtardy dárigerler durys qaramaǵan
NUR-SULTAN. QazAqparat – Temirtaýda patsıent retinde emhana jumysyn teksergen memlekettik bas sanıtarlyq dáriger Aıjan Esmaǵambetovany dárigerler durys qaramaı, qaýipsizdik quraldarymen qamtamasyz etpegen. Bul týraly Taýarlar men kórsetiletin qyzmetterdiń sapasy men qaýipsizdigin baqylaý komıtetiniń tóraǵasy Lıýdmıla Bıýrabekova málim etti, dep habarlaıdy QazAqparat tilshisi.
«Medıtsına qyzmetkerleriniń saqtyq deńgeıiniń tómen bolyp jatqanyn da atap ótý kerek. Máselen búgin memlekettik bas sanıtarlyq dáriger Aıjan Serikbaıqyzy Qaraǵandy oblysyna barǵan kezinde Temirtaýdaǵy ınfektsııalyq statsıonarǵa patsıent retinde kirip shyqqan. Ondaǵy qyzmetkerler atalǵan patsıentke abaılap tekserý tártibin saqtamaǵan. Ony jeke qaýipsizdik quraldarymen qamtamasyz etpeı búkil qabyldaý bólimi arqyly dárigerdiń qaraýyna aparǵan», - dedi Lıýdmıla Bıýrabekova OKQ-da onlaın rejımde ótken baspasóz máslıhatynda.
Aıta ketsek, qazirgi tańda Qazaqstanda koronavırýs juqtyrǵan azamattardyń sany 979 adamǵa jetti. Onyń ishinde 110 adam jazylyp shyqqan. 12 adam kóz jumdy.
