Temirtaýda órtten jas bala ajal qushty
QARAǴANDY. QazAqparat - Temirtaýda úıdegi dıvannan shyqqan órttiń saldarynan tútinge tunshyqqan tórt jasar qyz ajal qushyp, onyń ata-anasy men aǵasy (ol da jas bala) aýrýhanaǵa jetkizilgen, dep habar beredi «QazAqparat» HAA tilshisi.
Qaraǵandy oblystyq Tótenshe jaǵdaılar departamentiniń baspasóz qyzmetiniń habarlaýynsha, órt Pobeda kóshesindegi bes qabattyq úıdiń ekinshi qabatyndaǵy páterden shyqqan. «Órt sharpyǵan jer aıtarlyqtaı úlken bolmaǵan. Onyń aýmaǵy alty sharshy metrdi qamtyǵan. Dıvannyń qaptamasy janǵan», - deıdi óńirdiń TJ jónindegi departamentiniń baspasóz qyzmetindegiler.
Órt sóndirýshiler es-tússiz jatqan tórt adamdy tapqan, olar: er adam, áıel kisi jáne eki bala. Kishkentaı qyz «Jedel járdem» mashınasynda qaıtys bolǵan. Aýrýhananyń qabyldaý bólmesindegiler er, áıel jáne balanyń jan saqtaý bóliminde jatqanyn aıtty. «Órt-tehnıkalyq saraptamalary júrgizilip, órttiń shyǵý sebepteri anyqtalýda», - delinedi TJD málimdemesinde.
